Нобел мукофоти совриндорлари сиёсий маҳбусларни озод қилишга чақирди
Нобел мукофоти совриндорлари Украинадаги тинчлик келишувини сиёсий маҳбусларни озод қилиш билан боғлашга чақирди.
2021-йилги Тинчлик бўйича Нобел мукофоти совриндори Дмитрий Муратов ва яна 16 нафар лауреат Путин, Трамп, Зеленский ва Европа Иттифоқига очиқ хат йўллаб, келажакдаги тинчлик келишувига сиёсий маҳбусларни озод қилишни киритишга чақирди:
«Биз тинчлик келишуви лойиҳасига халқаро ташкилотлар томонидан сиёсий маҳбус деб тан олинган фуқароларни афв этиш ёки алмаштириш тўғрисидаги бандни киритишни сўраймиз. [… Ишончимиз комилки, агар жаноб Путин ва Зеленский хайрихоҳлик кўрсатиб, фақат шахсий фикрини билдиргани учун қамалган ва зўравонлик жиноятларини содир этмаган камида бир неча ўнлаб одамларни ўзаро афв этишса, бу мустаҳкам ва адолатли тинчлик ўрнатилишини тезлаштиради.»
Мактуб муаллифлари Россия қамоқхоналарида урушга қарши позицияда бўлгани учун судланган мингдан ортиқ киши сақланаётганини эслатган.
