BTS асосчиси қамалиши мумкин
Жанубий Корея ҳукумати BTS гуруҳининг асосчиси ва продюсери Пан Си Ҳёкни инвесторлар билан боғлиқ фирибгарлик орқали 100 миллион доллардан ортиқ маблағни ноқонуний ўзлаштирганликда айбламоқда. Бу ҳақда Reuters агентлиги хабар берди.
Жанубий Корея полицияси тадбиркорни ҳибсга олиш учун ордер сўрамоқда. Пан Си Ҳёкка қўйилаётган айбловлар унинг “ҲЙБЕ” мусиқий лейбли билан боғлиқ бўлиб, BTS гуруҳи ҳозиргача ушбу лейбл билан ҳамкорлик қилиб келади.
Ҳуқуқ-тартибот идоралари ходимларининг тахминича, 2019-йилда Пан Си Ҳёк инвесторларга ҲЙБЕънинг биржага чиқиш режалари йўқлигини айтиб, уларни чалғитган. Бу эса инвесторларни ўз акцияларини бир инвестиция фондига сотишга ундаган, шундан сўнг компания барибир IPO ўтказган. Кейинчалик ўша фонд нархи ошган акцияларни сотган. Полиция версиясига кўра, Пан Си Ҳёк бу ҳақда фонд билан олдиндан келишиб олган ва натижада унинг фойдасининг 30 фоизини — қарийб 200 миллиард вонни (136 млн доллар) қўлга киритган.
Мусиқий продюсернинг ҳуқуқшунослар жамоаси Associated Press агентлигига берган баёнотида “узоқ вақт давомида тергов билан тўлиқ ва изчил ҳамкорлик қилинганига қарамай”, полиция уни ҳибсга олишга уринаётганидан афсусда эканлигини билдирди. “Биз барча ҳуқуқий жараёнларда ҳамкорликни давом эттирамиз ва ўз позициямизни аниқ тушунтириш учун барча саъй-ҳаракатларимизни ишга соламиз”, дейилган.
Август ойидан бошлаб Пан Си Ҳёкнинг Жанубий Кореядан чиқиши тақиқланган.
2005-йилда Бан Ши Ҳёк Биг Ҳит Entertainment номли мусиқий лейблга асос солди. 2013-йилда ушбу лейбл ҳомийлигида Жанубий Кореянинг энг машҳур гуруҳларидан бири — BTS ташкил этилди.
