Отабек Мирзахолов: Ракетасозликдан кулги саҳнасигача бўлган йўл
Комик актёр, сценарийнавис ва “Браво” кулги жамоасининг собиқ аъзоси Отабек Мирзахолов “Менинг юртим” телеканалидаги “Ўзимизнинг гап” кўрсатувида иштирок этиб, ҳаёти ва ижодий фаолияти ҳақида очиқ суҳбат қилди. У интервью давомида асли касби, санъатга қандай кириб келгани, устози Жаҳонгир Позилжонов билан танишуви ҳамда тадбиркорликдаги омадсиз тажрибаси ҳақида сўзлаб берди.
“Асли касбим — ракетасозлик”
Мирзахоловнинг айтишича, у болалигида футболга қизиққан. Кейинчалик эса Тошкент давлат авиация институтида авиация ва ракетасозлик йўналишида таҳсил олган. Бироқ талабалик йилларида унинг ҳаёти кутилмаганда “ҚВЗ” орқали ижод билан боғланиб кетади.
У 2007 йилдан “Қувноқлар ва зукколар”да қатнашиб, 2008 йилдаёқ финалга чиқиб, иккинчи ўринни эгаллаган. Айнан шу танловда уни устози Жаҳонгир Позилжонов кўриб қолади ва уни “Бойвачча 2” фильмида кичик ролга таклиф қилади.
Шу эпизоддан сўнг у сценарий ёзишга қизиқиб, Миркомил Мусаев ва Шерзод Ўлмасов билан биргаликда ижодий жамоада ишлай бошлайди. Бу эса унинг санъатдаги йўлини белгилаб беради.
“Кулдиришни танладим”
Актёр илк йирик ишларидан бири — “Ёлғизгинам” драмаси ҳақида ҳам тўхталиб ўтди. Ушбу фильмда у ҳам сценарий муаллифи, ҳам режиссёр сифатида иштирок этган.
Бироқ фильм намойиши вақтида у кутилмаган ҳолатга дуч келади: кинони кўраётган томошабинлардан бири шахсий ҳаётидаги муаммоларни эслаб, йиғлаб ўтирганини кўради. Шу воқеа унга кучли таъсир қилади.
Шундан сўнг Мирзахолов драма жанридан кўра комедияни танлашга қарор қилади:
унинг фикрича, инсонларнинг кайфиятини кўтариш, уларни кулдириш — энг катта ютуқ.
“Режиссёрлик — мен учун хобби”
Қарийб 20 йиллик фаолияти давомида у ўнлаб фильмлар яратилишида иштирок этган бўлса-да, ўзини профессионал режиссёр ёки сценарист сифатида кўрмайди.
Унинг таъкидлашича, санъатга у махсус таълим орқали эмас, балки ҳаёт йўли орқали кириб келган. Шунинг учун у ижодни хобби сифатида қабул қилади.
— Дунёдаги энг бахтли инсонлар — севган иши орқали тирикчилик қилаётганлар. Мен ҳам ўзимни шулар қаторида деб биламан, — дейди у.
Бугунги кунда Отабек Мирзахолов турли йўналишларда ижод қилиб, сценарий ёзиш, сериал ва клиплар суратга олиш билан шуғулланмоқда. У идеалликка даъво қилмаслигини айтса-да, ҳар бир ишини чин дилдан бажаришга ҳаракат қилишини таъкидлади.
