Энди бу бечора ҳам бошқа нима десин?!
Эвертон» билан дурангдан (3:3) сўнг Пеп Гвардиола руҳан тушкун, аммо очиқ гапирди. Иккинчи бўлимдаги омадсизлик — «шаҳарликлар» ўн уч дақиқа ичида учта гол ўтказиб юбориши натижасида «Арсенал» очколар борасида бештага ўзиб кетди. Энди ҳатто қолдирилган ўйиндаги ғалаба ҳам «Манчестер Сити»га чемпионликни кафолатламайди. Гвардиола хато қилиш ҳуқуқи тугаганини ва энди унинг жамоаси фақат «канонирлар»нинг қоқилишини кутишга мажбурлигини тан олди.
— Биз ушбу бир очкони қабул қиламиз ва ҳаммаси тугамагунча курашишда давом этамиз. Дуранг мағлубиятдан кўра яхшироқ. Биз ғалаба учун ўйнадик ва йигитларнинг фидойилиги бу қандай жамоа эканлигини кўрсатди. Биз ҳаракат қилдик ва қўлимиздан келган барча ишни бажардик.
Аммо энди вазият бизнинг қўлимизда эмас. Илгари ҳаммаси фақат ўзимизга боғлиқ эди, энди эса йўқ. Премьер-лиганинг қолган тўртта ўйинида ғалаба қозонишимиз керак. Олдинда «Брентфорд»га қарши баҳс турибди, у ҳам бугунги ўйинга ўхшаш бўлади. Кўрамиз, нима содир бўларкан.
«Эвертон» меҳмони бўлиш доимо қийин кечган. «Ирислар»га совуққонлиги ва тажовузкорлиги учун лойиқ бўлган мақтовларни айтиш керак. Иккинчи бўлимда улар босимни оширишди, биз эса ўйин назоратини йўқотдик ва биринчи голни ўтказиб юбордик. Шундан сўнг шиддатли дуэллар билан ҳақиқий инглиз футболи бошланди. Умуман олганда, биз яхши ўйин кўрсатдик, лекин ўн киши бўлиб ҳимояда турган, Бету ва Дьюсбери-Холл эса қарши ҳужумга қочадиган жамоа мудофаасини ёриб ўтиш ўта мураккаб.
Олдинда шунча иш турганда очко йўқотиш оғриқли. Биз икки очкони бой бердик, лекин курашни давом эттирамиз — биз буни ўзимиз ва мухлисларимиз учун қилишимиз шарт, — деди Гвардиола.
