UFC. Хамзат Чимаев фаолиятида илк бор мағлуб бўлди ва чемпионлик камарини қўлдан чиқарди
UFCда йилнинг энг катта сенсацияларидан бири юз берди. UFC 328 турнирининг марказий жанги ўрта вазн тоифаси чемпиони Хамзат Чимаев ҳамда америкалик Шон Стрикленд ўртасида ўтказилди. Беш раунд давом этган жанг якунда ҳакамларнинг бўлинган қарори эвазига Стрикленднинг ғалабаси билан тугади.
Шу тариқа Чимаев MMAдаги фаолияти давомида илк бор мағлуб бўлди ва камаридан маҳрум бўлди. Стрикленд эса иккинчи бор UFC ўрта вазн тоифаси чемпиони бўлди. Эндиликда унинг ҳисобида MMA’да 15 та ғалаба ва битта мағлубият мавжуд. 35ёшли Стрикленднинг рекорди эса 31 та ғалаба ва 7 та мағлубиятдан иборат.
Ҳамзат Чимаев 2025 йил 17 август куни Чикаго шаҳрида ўтказилган UFC 319 турнирида жанубий африкалик Дрикус дю Плесси устидан ғалаба қозониб, чемпионлик камарини қўлга киритган эди.
1994 йилда туғилган Чимаев 2020 йилда UFC’да дебют қилган ҳамда 66 кун ичида 3 та жанг ўтказиб, ўзига хос рекорд қайд этган. 2021 йил март ойида спортчи коронавирус асоратлари сабабли фаолиятини якунлашини эълон қилган эди. Ўшанда спортчига саратон ташхиси қўйилгани ҳақида хабарлар тарқалган, бироқ қайта текширувлардан сўнг хавфли касаллик аниқланмаган ва Ҳамзат октагонга қайтган.
У ҳозирга қадар Жералд Мёршарт, Ли Жинглиан, Гилберт Бёрнс, Кевин Холланд, Камару Усман, Роберт Уиттакер ва Дрикус дю Плесси каби номдор жангчиларни мағлуб этган.
Маълумот учун, UFC 328 турнири доирасида ўзбекистонлик Богдан Гусков собиқ чемпион Ян Блаховичга қарши реванш жангида октагонга чиқиши белгиланган эди, бироқ полшалик жангчининг кутилмаган жароҳати сабаб беллашув бекор қилинди.
