Эрон дунёни интернетсиз қолдириши мумкин – CNN
Эрон Ҳормуз бўғози орқали ўтган сувости интернет кабелларидан фойдаланиш учун йирик технологик компаниялардан тўлов ундиришни режалаштирмоқда. Акс ҳолда, мамлакат уларни узиб қўйиши мумкинлиги ҳақида огоҳлантирмоқда. Бу ҳақда CNN телеканали хабар тарқатди.
Маълум қилинишича, Ҳормуз бўғози блокадаси ортидан Теҳрон жаҳон иқтисодиётининг муҳим “яширин артерияси”дан даромад олишга қарор қилган. Гап Европа, Осиё ва Форс кўрфази ўртасида интернет-трафик ҳамда молиявий операцияларни узатувчи сувости кабеллари ҳақида кетмоқда.
Қайд этилишича, Эрон Ҳормуз бўғози тубидан ўтган интернет кабелларидан фойдаланганлик учун дунёнинг энг йирик технологик корпорацияларидан ҳақ талаб қилмоқчи. Агар компаниялар белгиланган тўловни амалга оширмаса, уларга интернет трафиги узилиши мумкинлиги ҳақида мавҳум таҳдидлар билдирилмоқда.
CNN маълумотига кўра, Теҳрон Google, Microsoft, Meta ва Amazon каби компаниялардан Эрон қонунчилигига бўйсунишни талаб қилмоқда. Шу билан бирга, сувости кабеллари билан ишловчи компаниялар лицензия тўловларини амалга ошириши, уларни таъмирлаш ва техник хизмат кўрсатиш ҳуқуқи эса фақат Эрон компанияларига берилиши мумкин.
Телеканал таъкидлашича, кабелларга зарар етиши бутун дунё бўйлаб триллионлаб долларлик маълумотлар алмашинувига ва глобал интернет тармоғига жиддий таъсир кўрсатиши мумкин.
Шунингдек, мақолада АҚШ президенти Donald Trumpнинг Хитойдан қайтиши ортидан минтақадаги можаролар яна кучайиши мумкинлиги ҳақида хавотирлар ортиб бораётгани айтилган.
CNN фикрича, Эрон нафақат ҳарбий куч, балки географик жойлашуви орқали ҳам дунё иқтисодиётига таъсир ўтказиш имкониятига эга эканини кўрсатмоқда. Теҳрон Ҳормуз бўғозининг стратегик аҳамиятидан узоқ муддатли иқтисодий ва сиёсий қудрат сифатида фойдаланишга интилаётгани қайд этилган.
