Мессининг жароҳати Аргентина учун катта муаммога айланиши мумкин
Интер Миами жамоасининг Филадельфия Юнион устидан қозонган 6:4 ҳисобидаги ғалабасида Лионель Месси кутилмаган жароҳат олди. Учрашувнинг 73-дақиқасида Аргентина терма жамоаси сардори оёғининг орқа қисмини ушлаганча майдонни тарк этди. Унинг ўрнига Матео Силветти ўйинга қўшилди. Бу ҳақда Goal.com хабар беради.
Вазият Аргентина терма жамоаси учун хавотирли тус олмоқда, чунки жамоанинг Жаҳон чемпионати олдидан йиғини 1-июн куни бошланиши режалаштирилган. Лионель Месси иккинчи бўлим ўрталарида захира сўради ва туннел бўйлаб кетаётганда оғриқ сезаётгани яққол кўзга ташланди. Ҳозирча жароҳатнинг қай даражада жиддий экани маълум қилингани йўқ.
Лионель Скалони бошқарувидаги жамоа учун бу катта йўқотиш бўлиши мумкин. Аргентина турнир олдидан 6 ва 9-июн кунлари ўртоқлик учрашувларини ўтказади, гуруҳ босқичидаги илк ўйин эса 16-июнга белгиланган. Бу 37 ёшли юлдуз учун фаолиятидаги сўнгги Жаҳон чемпионати бўлиши кутилмоқда.
Учрашувнинг ўзига тўхталадиган бўлсак, Интер Миами 0:2 ҳисобида ортда қолаётганига қарамай, иродали ғалабани қўлга киритди. Мессининг узоқ йиллик жамоадоши Луис Суарез хет-трик қайд этган бўлса, захирадан тушган Силветти муҳим ассистни амалга оширди. Энди жамоа июль ойи ўрталарига қадар танаффусга чиқади.
Маълумот учун, Лионель Месси 2025-йилги мавсумда жароҳатлардан деярли холи бўлиб, MLS доирасидаги барча 13 та учрашувда тўлиқ ҳаракат қилган эди. Унинг соғлиғи борасидаги якуний хулоса тиббий кўриклардан сўнг эълон қилинади.
