Россиянинг Ҳиндистонга нефт экспорти 70 фоизга ошди
Май ойида Россия нефтининг Ҳиндистонга етказиб берилиши АҚШнинг Эрон билан уруши бошланишидан олдинги феврал ойидаги даражага нисбатан 70 фоизга (кунига тахминан 1,85 миллион баррелгача) ошди, деб хабар бермоқда Bloomberg агентлиги.
Теҳрон амалда Ҳўрмуз бўғозини ёпиб қўйганидан сўнг, Россия нефти экспорти унинг асосий харидорлари бўлган Хитой ва Ҳиндистон учун ҳаётий муҳим аҳамиятга эга бўлди.
Яқин Шарқдаги можарода Москва кам сонли йирик ғолиблардан бирига айланди: Россия нефти нархи жаҳон бенчмарклари ортидан кескин кўтарилди, Трамп эса Россия нефти етказиб берилишига қўйилган санкцияларни бекор қилиб, «Москвага яна бир қутқарув арқонини ташлади». Бу, хусусан, Ҳиндистон нефтни қайта ишлаш заводларига харидларни кўпайтиришни осонлаштирди, деб ёзади агентлик.
Украина эса сўнгги пайтларда зарбалар марказини портлардан нефтни қайта ишлаш заводларига кўчирди, бу эса Россияга экспортнинг юқори даражасини сақлаб қолиш имконини бермоқда, дейилади хабарда.
