Қозоғистон Эрон уранини қабул қилишга тайёрлигини билдирди
Қозоғистон Эроннинг бойитилган уран захираларини сақлаш учун қабул қилиши мумкин. Бундай имконият Теҳрон ва Вашингтон ўртасида тегишли келишувга эришилган тақдирда кўриб чиқилади. Бу ҳақда Атом энергияси бўйича халқаро агентлик (МАГАТE) бош директори Рафаел Гросси маълум қилди.
Гроссининг айтишича, Остона бундай вариантни кўриб чиқишга тайёр эканини Қозоғистон президенти Қосим-Жомарт Тоқаев билан ўтказилган музокаралар чоғида билдирган. У мамлакатда МАГАТE назорати остидаги паст бойитилган уран банки фаолият юритаётганини ва бу каби материалларни хавфсиз сақлаш имконини беришини таъкидлади.
Гап тахминан 440 килограмм миқдоридаги, 60 фоизгача бойитилган Эрон урани ҳақида кетмоқда. Мутахассислар баҳолашича, ушбу материал янада бойитилса, бир неча ядровий заряд тайёрлаш учун етарли бўлиши мумкин.
«Эрон уранини бошқа давлатга топшириш ёки сақлаш масаласи АҚШ ва Эрон ўртасида муҳокама қилинаётган эҳтимолий келишув доирасида кўриб чиқилмоқда. Муҳокама қилинаётган чоралар қаторига ўт очишни тўхтатиш режимини узайтириш, Ҳўрмуз бўғози орқали эркин кемалар қатновини таъминлаш ҳамда Теҳроннинг ядровий дастури бўйича янги музокараларни бошлаш киради.
Асосий баҳсли масалалардан бири уран захираларининг кейинги тақдири бўлиб қолмоқда. АҚШ президенти Доналд Трамп ушбу захираларни Эрондан олиб чиқиш ёки халқаро назорат остида йўқ қилиш тарафдори эканини билдирган. Шу билан бирга, Вашингтон бу материалларни Россия ёки Хитойга топшириш вариантини рад этмоқда.
Аввалроқ АҚШ ва Эрон 60 кунлик сулҳ режимини жорий этиш ҳамда ядровий дастур бўйича музокараларни бошлашни назарда тутувчи меморандум лойиҳасини келишиб олгани ҳақида хабарлар тарқалган эди. Теҳрон эса уран захираларини АҚШга топширишни режалаштирмаётганини, бироқ уларни учинчи давлатга олиб чиқиш имкониятини истисно қилмаслигини маълум қилган.
