АҚШ «Anthropic»нинг янги моделлари хорижий ҳарбий разведкада фойдаланилишидан хавотирда
АҚШ Савдо вазири Ҳовард Лутник «Anthropic» компаниясининг янги «Mythos» ва «Fable» сунъий интеллект моделларига нисбатан фавқулодда чекловлар жорий қилди. «Reuters» хабар беришича, расмийлар ушбу технологиялар Хитой, Россия ёки АҚШ хавотирда бўлган бошқа давлатларнинг ҳарбий разведка тузилмалари томонидан қўлланилиши мумкин деб ҳисобламоқда.
АҚШ Савдо вазири 13 июн куни компания бош директори Дарио Амодейга йўллаган мактубида мазкур моделларнинг бутун дунё бўйлаб экспорт қилиниши ва хорижий фуқароларга тақдим этилишини тўхтатишни талаб қилган. Шунинг ортидан «Anthropic» ўзининг энг янги моделларига кириш имкониятини барча фойдаланувчилар учун вақтинча чеклади.
Маълум қилинишича, АҚШ ҳукумати «Fable 5» моделидаги хавфсизлик чекловларини айланиб ўтиш имкони мавжудлигидан хавотир билдирган. Компания эса аниқланган камчиликлар жиддий эмаслиги ва бундай имкониятлар бошқа оммавий моделларда ҳам учрашини таъкидлаган.
«Reuters» маълумотига кўра, душанба куни «Anthropic» техник мутахассислари Вашингтондаги Савдо вазирлиги расмийлари билан учрашиб, вазият бўйича ечим излаган. Учрашувда АҚШ Миллий киберхавфсизлик директори Шон Кейрнкросс ҳам иштирок этган.
Манбаларнинг билдиришича, компания ва ҳукумат ўртасида деярли ҳар куни мулоқотлар ўтказилмоқда. Ҳукумат моделлардан АҚШ манфаатларига қарши фойдаланилмаслиги бўйича кафолатлар талаб қилмоқда.
Шу билан бирга, «Anthropic» ўзининг юқори даражадаги моделларини қайта ишга туширишга интилаётгани айтилмоқда. Дарио Амодей ва Ҳовард Лутник яқин кунларда Францияда бўлиб ўтадиган G7 йиғилишида иштирок этади ва музокаралар у ерда ҳам давом этиши мумкин.
Савдо вазирлиги ушбу қарорни 2018 йилда қабул қилинган Экспорт назоратини ислоҳ қилиш тўғрисидаги қонун доирасида қабул қилган. Экспорт назорати бўйича мутахассислар бу ваколат биринчи марта сунъий интеллект технологияларига нисбатан қўлланилаётганини таъкидламоқда.
Бироқ ҳуқуқшунослар ва соҳа экспертлари мазкур қарорнинг қонуний асослари юзасидан саволлар туғилаётганини билдирмоқда. Чунки сунъий интеллект моделлари одатда экспорт қилинмайди, балки масофавий кириш орқали тақдим этилади.
Айни пайтда 80 дан ортиқ киберхавфсизлик мутахассиси ва йирик технология компаниялари вакиллари АҚШ ҳукуматини чекловларни қайта кўриб чиқишга чақирган. Улар бу қарор инновациялар ва киберхавфсизлик соҳасидаги тадқиқотларга салбий таъсир кўрсатиши мумкинлигини таъкидламоқда.
