Россия 2026 йил июн ойида Беларус бензини импортини рекорд даражага етказди
«Ведомости» нашри Нарх индекслари маркази маълумотларига таяниб ёзишича, 1 июндан 25 июнгача Россияга Беларусь давлатидан 141 минг тонна ёнилғи олиб келинган. Бу кўрсаткич май ойидаги умумий етказиб бериш ҳажмидан 2,4 баробар кўпдир. 2025 йил июн ойида эса Беларусьдан Россияга атиги 1 минг тонна бензин импорт қилинган эди.
Нарх индекслари маркази маълумотларига кўра, Беларус илгари Марказий Осиё давлатлари учун мўлжалланган ёнилғи ҳажмини Россияга йўналтирган.
Нашр томонидан сўралган экспертларнинг фикрича, Беларус бензини импортининг ошиши Россия бозоридаги ёнилғи вазиятини яхшилашга ёрдам беради, бироқ бензин тақчиллигини тўлиқ бартараф этолмайди.
Энергетика бўйича эксперт Кирилл Родионов «Ведомости»га берган интервьюсида Беларус ойига тахминан 150–170 минг тонна ёнилғи экспорт қилиш имкониятига эга эканини маълум қилди.
Аввалроқ Reuters агентлиги Россияда ёз мавсумида бензин истеъмоли суткасига камида 110 минг тоннани ташкил этишини хабар қилган эди.
