БМТ: Ёрдам маблағларини янада қисқартириш Европа Иттифоқи учун хато бўлади

БМТ Тараққиёт дастури (БМТТД) раҳбари ва Бельгиянинг собиқ бош вазири Александр де Кронинг таъкидлашича, Европа Иттифоқи халқаро ёрдам дастурларини молиялаштиришни янада қисқартирса, бу жиддий стратегик хато бўлади.

У Euractiv порталига берган интервьюсида европаликлар қиладиган энг катта хато дунёнинг қолган қисмидан юз ўгириш бўлишини таъкидлади.

Де Кронинг сўзларига кўра, Европа глобал инқирозларни фақат улар юзага келганидан кейин эмас, балки «проактив» ривожланиш дастурлари орқали олдини олишга ҳаракат қилиши ва халқаро жараёнларда янада фаол иштирок этиши лозим.

Унинг фикрича, акс ҳолда Европа мамлакатлари бир инқироз ортидан иккинчисини бартараф этиш учун анча катта молиявий ва сиёсий харажатларга дуч келади.

Шунингдек, Александр де Кро АҚШ Халқаро тараққиёт агентлиги (USAID) фаолияти қисқарганидан кейин халқаро ёрдам тизимида муайян «бўшлиқ» юзага келганини қайд этди. Унинг айтишича, ушбу бўшлиқни Европа Иттифоқи институтлари ва аъзо давлатлар биргаликда тўлдириши мумкин.