АҚШ Россия билан боғлиқ иккита нефть танкерини металлоломга сотди
АҚШ ҳукумати Россия билан алоқадор бўлган ва халқаро санкцияларни бузганликда айбланиб мусодара қилинган иккита нефть танкерини утилизация қилиш (металлолом) учун сотиб юборди. Бу ҳақда Reuters агентлиги хабар берди.
Гап «Era» ва «Lileo» номли кемалар ҳақида кетмоқда. Улар Дубайда жойлашган компанияга сотилган бўлиб, бутунлай қисмларга ажратиб ташланиши учун Ҳиндистоннинг Аланг кемасозлик верфига юборилган. Иккала танкер ҳам жорий йилнинг бошида АҚШнинг Венесуэла қирғоқлари яқинидаги денгиз операцияси давомида қўлга олинган эди. Улар санкцияларни айланиб ўтиб, ноқонуний нефть ташиш билан шуғулланган «яширин флот»нинг бир қисми ҳисобланади.
Мусодара қилинган кемаларнинг камида биттаси Россия байроғи остида сузган. Ўшанда кемалар ҳибсга олинганидан сўнг, Москва расмий Вашингтонни халқаро денгиз ҳуқуқи нормаларини бузишда, «ноқонуний куч ишлатиш ҳаракати» ва кемалар қатнови эркинлигини чеклашда айблаб, кескин норозилик билдирган эди.
