Криштиану Роналду 9 йиллик севгидан сўнг Жоржинага уйланди
“Ан-Насср” ва Португалия терма жамоасининг 41 ёшли ҳужумчиси Криштиану Роналду 32 ёшли модел Жоржина Родригесга уйланди. Жуфтлик ижтимоий тармоқларда никоҳ узуклари акс этган суратни жойлаб, бу хабарни оммага улашди. People нашрининг хабар беришича, никоҳ маросими 11 август куни Лиссабон яқинида жойлашган Португалиянинг соҳилбўйи шаҳри — Кашкайшда бўлиб ўтган. Кутилганидан фарқли ўлароқ, тўй қатъий сир сақланган ва фақат оила аъзолари иштирокида ўтган. Маросимда фақатгина уларнинг беш нафар фарзанди қатнашгани айтилмоқда.
Криштиану ва Жоржина ижтимоий тармоқларда узук тақилган қўлларининг суратини эълон қилиб, унга шунчаки “Криштиану Жоржинанни севади” дея қисқача изоҳ қолдирган.
Маълумот ўрнида, Роналду ва Родригес 2016-йилда Мадридда танишган. Ўшанда Жоржина “Gucci” дўконида сотувчи бўлиб ишларди. Бугунги кунга келиб жуфтликнинг Алана Мартина ва Белла Эсмералда исмли икки қизи бор. Умуман олганда, улар беш нафар фарзандни тарбияламоқда. Яна уч нафар фарзанд — кичик Криштиану ҳамда эгизаклар Матео ва Ева суррогат оналар ёрдамида дунёга келган.
Жуфтлик тўйга тайёргарлик кўраётгани ҳақида ўтган йилиёқ маълум бўлганди. 2025-йилнинг 11 августида Жоржина Криштиану билан унаштирилганини эълон қилган. Кейинчалик португалиялик юлдуз 2026-йилги Жаҳон чемпионатидан сўнг севгилисига уйланиш ниятида эканини таъкидлаган эди.
Жаҳон чемпионати якунланиши биланоқ, ОАВда яқинлашиб келаётган тўй ҳақида турли миш-мишлар урчий бошлади. Маросимнинг жойи ва санаси бўйича бир нечта тахминлар илгари сурилди. Уларнинг энг ишончлиси Роналду 8 август куни ўзининг туғилиб ўсган жойи — Мадейра оролида уйланади, деган фараз эди. Бу хабарлар мантиқан тўғри кўринарди: Фуншалдаги бош собор маросим учун банд қилингани ва йирик тадбир учун беш юлдузли “Savoy Palace” меҳмонхонасининг бир қисми ижарага олингани таъкидланганди.
Гарчи Криштианунинг оиласи тўй ҳақидаги хабарларни расман рад этган бўлса-да, бу ўз кумирининг никоҳига гувоҳ бўлиш умидида Фуншал марказига йиғилган минглаб мухлисларни тўхтатиб қола олмади.
Айрим маълумотларга кўра, черков олдига 2 минггача одам тўпланган. Бироқ кўп ўтмай бутунлай бошқа жуфтликнинг никоҳ маросими ўтаётгани маълум бўлди. Тўй меҳмонларидан бири ҳатто маҳаллий матбуотга берган интервьюсида: “Биз ўзимизни худди юлдузлардек ҳис қиляпмиз”, дея ҳазиллашган.
