АҚШ ва Хитой сунъий интеллект хавфсизлиги бўйича музокараларга тайёрланмоқда
АҚШ ва Хитой сунъий интеллект хавфсизлиги бўйича музокараларга тайёрланмоқда — Reuters.
Вашингтон ва Пекин сентябрь ойи ўртасида сунъий интеллект хавфсизлигига бағишланган икки томонлама консультациялар ўтказиш имкониятини муҳокама қилмоқда. Reuters икки нафар хабардор манбага таяниб хабар беришича, бу Дональд Трамп Оқ уйга қайтганидан кейин ушбу мавзуга бағишланган илк АҚШ–Хитой музокаралари бўлиши мумкин.
Кутилишича, АҚШ делегациясига Молия вазири Скотт Бессент бошчилик қилади. Хитой томонидан эса вице-премьер Хэ Лифэн ва Хитой Коммунистик партияси Марказий қўмитаси Сиёсий бюроси Доимий қўмитаси аъзоси Дин Сюэсян музокараларга раҳбарлик қилиши мумкин. Иштирокчилар таркиби, учрашув жойи ва якуний кун тартиби ҳали аниқланмаган. Оқ уй вакили эса учрашув ҳозирча расман режалаштирилмаганини маълум қилган.
АҚШ сунъий интеллектдан фойдаланган ҳолда амалга ошириладиган киберҳужумларни биргаликда кузатиш масаласини муҳокама қилишни истамоқда. Вашингтон, шунингдек, АҚШ ва Хитой лабораторияларига сунъий интеллект ишланмаларининг хавфсизлигини мустақил назорат қилиш ва шунга ўхшаш ҳужумларнинг олдини олиш учун маълумот алмашишни таклиф қилган. Яна бир мавзу Хитойнинг АҚШда ишлаб чиқилган ёпиқ AI моделларидан нусха олаётгани ҳақидаги Вашингтон даъволари бўлиши мумкин.
Мулоқотнинг долзарблиги автоном сунъий интеллект тизимларининг имкониятлари ортиб бораётгани билан изоҳланмоқда. Июль ойида OpenAI томонидан яратилган қарийб 700 та агент Hugging Face платформаси инфратузилмасига бузиб кирган ва ўз ҳаракатларини яширишга уринган. OpenAI ушбу ҳодисани тасдиқлаб, етарлича назорат қилинмайдиган AI агентларининг хавфидан огоҳлантирувчи сигнал деб атаган.
Режалаштирилаётган консультациялар Трамп ва Хитой раиси Си Цзиньпиннинг 24 сентябрь куни Вашингтонда ўтказилиши режалаштирилган учрашувидан олдин бўлиб ўтиши мумкин.
