Непалда тошқиндан 10 кун ўтиб, вайроналар остида икки киши тирик ҳолда топилди
Непалда ҳалокатли тошқиндан 10 кун ўтиб, қутқарувчилар икки кишини тирик ҳолда топди — бир аёл уй вайроналари остида, Хитой фуқароси эса гидроэлектростанция туннелида аниқланган. Тахминан 60 ёшлардаги аёл Катманду яқинидаги Нувакот ҳудудида вайроналар остида топилган. Уни олиб чиққандан сўнг вертолётда шифохонага етказишган.
Деярли бир вақтнинг ўзида Непал ҳарбийлари ва Жанубий Корея қутқарувчиларидан иборат қўшма гуруҳ Upper Trishuli ГЭСи туннеллар тизимида хитойлик фуқарони топган. Қутқарувчилар туннел ичига тахминан 225 метр киришига тўғри келган. Жабрланган шахсга биринчи ёрдам кўрсатилиб, у ҳам вертолётда эвакуация қилинган.
Бир кун олдин Trishuli ГЭСи туннелидан яна икки нафар непаллик ишчи қутқарилган эди. Шу тариқа, икки кун ичида тўрт киши тирик ҳолда топилди. Ҳокимият бошқа туннелларда ҳам тирик қолганлар бўлиши мумкинлигига умид қилмоқда. 12 та гидроэнергетика объектида ишлаган қарийб 900 нафар ходим бедарак йўқолганлар рўйхатида. Уларнинг тахминан 500 нафари ер остида қолган бўлиши мумкин.
Тошқин 26 август куни Непал ва қўшни Тибет ҳудудларини қамраб олган. Тахминларга кўра, офатга музликнинг кўчиши сабаб бўлган. Непалда 1344 кишининг ҳалок бўлгани тасдиқланган, қарийб 4900 киши бедарак йўқолган деб ҳисобланмоқда. Тибетда эса 31 киши ҳалок бўлгани ва 531 киши бедарак экани хабар қилинган.
