Хитойдан Эронга биринчи блок-поезд йўлга чиқди
Марказий Осиё давлатлари ҳудуди орқали Хитой — Эрон йўналишида биринчи блок-поезд ҳаракати йўлга қўйилди.
55 вагондан иборат биринчи поездда автомобиллар учун эҳтиёт қисмлар, халқ истеъмоли товарлари ва бошқа турдаги юклар ташилмоқда.
Йўналиш Хитойдаги Чэнсян станциясидан бошланиб, Қозоғистон, Ўзбекистон ва Туркманистон ҳудудлари орқали Серахс чегара станциясигача етиб боради. Йўналишнинг умумий узунлиги 6000 километрдан ортиқ.
Поездни Қозоғистон темир йўллари (КТЖ) Хоргос — Олтинкўл чегара ўтиш пунктида қабул қилди. 7 сентябрь куни поезд Олтинкўл станциясидан белгиланган йўналиш бўйича ҳаракатини давом эттирди.
Кейинги босқичда блок-поезд Келес орқали Ўзбекистонга кириб келади ва Хўжадавлат станцияси орқали Туркманистонга йўл олади.
Ҳисоб-китобларга кўра, поезд манзилига 14–16 кун ичида етиб бориши керак.
«Ўзтемирйўлконтейнер» маълум қилишича, келгусида Хитой — Марказий Осиё — Эрон коридори бўйлаб контейнер блок-поездларининг мунтазам қатновини йўлга қўйиш режалаштирилмоқда.
