Лавров АҚШни урушни чўзишда айблади
Россия ташқи ишлар вазири Сергей Лавров Вашингтоннинг урушни тугатиш борасидаги позициясини танқид қилди. У Россиянинг Украинага қарши урушининг давом этаётганига сабаб сифатида «АҚШнинг Анкориждаги келишувлардан воз кечгани»ни кўрсатди.
«Агар америкаликлар Анкориждаги келишувлардан воз кечмаганида, агар Европаси уларни бу келишувлардан қайтармаганида, биз аллақачон бир йилдан бери урушсиз яшаётган бўлардик. Бу аниқ факт», — деди Лавров.
У бу гапларни «Украина инқирози. Ғарбнинг ҳуқуқий агрессияси» мавзусидаги 13-элчилар давра суҳбатида айтди.
АҚШ президенти Дональд Трамп ва Россия президенти Владимир Путиннинг учрашуви 2025 йил август ойи ўртасида Аляскадаги Анкориж шаҳрида бўлиб ўтган. Учрашув натижалари расман очиқланмаган. Бироқ кейинчалик Россия дипломатлари ва амалдорлари Украинада тинчлик ўрнатиш бўйича музокараларнинг икки томонлама келишилган сиёсий асосини «Анкориж келишувлари» ва «Анкориж руҳи» деб атай бошлаган.
BBC мухбирларининг хабар беришича, Россия амалдорлари ўша пайтда АҚШ ва Россия президентлари Украинадаги урушни тугатиш шарти сифатида Донбасснинг барча ҳудудлари, жумладан Россия ҳали эгалламаган ҳудудларни ҳам Москвага бериш масаласида келишганини англатувчи баёнотлар берган.
Бироқ амалда Путин ва Трамп ўша учрашувда ҳеч қандай келишувга эришмаган. Буни АҚШ давлат котиби Марко Рубио 2026 йил ёзида Лавров билан учрашувидан кейин тасдиқлаган.
Лавров ўшанда ҳам Европа сиёсатчиларини АҚШни музокараларни шу йўналишда давом эттиришдан қайтарганликда айблаган.
Америка ОАВлари эса манбаларга таяниб, Вашингтон Украина фронтдаги муваффақиятларидан ва Россиянинг ҳудудий масаладаги муросасиз позициясидан таъсирлангани, шу сабабли музокараларни «самарасиз бўлиб қолган» деб баҳолаганини ёзган.
АҚШ, Россия ва Украина ўртасидаги уч томонлама музокараларни қайта бошлаш эҳтимоли ҳақида гаплар Дональд Трамп вакиллари сентябрь ойи бошида Москва ва Киевга ташриф буюрганидан кейин яна пайдо бўлди.
