Қозоғистон Россияга бензин етказиб бермаган
Қозоғистон Энергетика вазирлиги россиялик журналистларнинг сўровига жавобан мамлакат Россияга АИ-92 бензинини етказиб бермаганини маълум қилди.
Вазирликнинг таъкидлашича, бундай экспортни амалга ошириш учун тегишли халқаро келишувларга эришиш ва аввало Қозоғистон ички бозори эҳтиёжларини тўлиқ қоплаш зарур.
«Экспорт ҳажмини реализация қилиш тегишли халқаро келишувларга эришиш, шунингдек, Қозоғистон Республикаси ички бозори эҳтиёжларини сўзсиз таъминлаш шарти билан амалга оширилади. Шу муносабат билан 2026 йилда Қозоғистон НПЗларидан Россия Федерациясига АИ-92 автомобиль бензини жўнатилмаган», — деб ТАСС Қозоғистон Энергетика вазирлиги маълумотини келтирган.
Аввалроқ Қозоғистон нефтьни қайта ишлаш заводлари Россияга бензин етказиб бериш учун ажратилган квоталарни танламагани ҳақида хабарлар тарқалган эди.
Қозоғистон қўшни давлатларда ёқилғи нархи мамлакатдагидан юқори бўлгани сабабли автомобиль бензини экспорти имкониятини ёпган.
Шу билан бирга, Украина томонидан Россия нефть саноати объектларига берилган зарбалар Россиянинг қатор ҳудудларида жиддий ёқилғи танқислигини келтириб чиқаргани хабар қилинмоқда.
