Арманистон ва Россия темир йўли масаласида ҳали ҳам келиша олмаяпти
Ереван масалани ҳал қилиш учун аниқ муддат белгиламаган, аммо музокараларни имкон қадар тезроқ якунлашга умид қилмоқда.
Арманистон ва Россия Арманистон темир йўлини концессия асосида бошқариш масаласини муҳокама қилишда давом этмоқда. Ҳозирча бу борада янги қарор қабул қилинмаган. Бу ҳақда Арманистон бош вазири Никол Пашинян 17 сентябрь куни журналистлар билан мулоқотда маълум қилди.
Пашиняннинг сўзларига кўра, масала ҳали ҳам «жуда нозик» бўлиб қолмоқда. «Вазият ўзгаргани йўқ, муҳокамалар давом этмоқда, бу жуда нозик масала», — деди у.
Бош вазир Арманистон томони темир йўлни ўз мулки деб ҳисоблашини ва уни қандай бошқаришни мустақил белгилаш имкониятига эга бўлиши кераклигини таъкидлади.
«Бу бизнинг мулкимиз ва биз ўз мулкимизни ўзимиз хоҳлаган тарзда тасарруф этиш имкониятига эга бўлишимиз керак», — деди Пашинян.
Унинг айтишича, Ереван масалани ҳал қилиш учун аниқ муддат белгиламаяпти. Бу масала икки томонлама муносабатларнинг бошқа жиҳатлари билан биргаликда муҳокама қилинмоқда.
«Биз бу масалани бошқа масалалар билан боғлиқ ҳолда хотиржам муҳокама қиляпмиз. Уни имкон қадар тез ва дўстона ҳал қилиш устида ишлаяпмиз», — деди бош вазир.
2026 йил май ойида Пашинян темир йўлни концессия асосида бошқаришга ёндашувни ўзгартириш нияти борлигини билдирган эди. Унинг мақсади эҳтимолий санкция чекловлари Арманистон темир йўл тизимининг ривожланишига тўсқинлик қилмаслигини таъминлашдан иборат.
