Чатботлардан кўп фойдаланадиган одамлар ўзлари ҳам «ботлардек» гапира бошлади
Сунъий интеллект чатботларидан мунтазам фойдаланадиган одамлар кундалик мулоқотда ҳам нейротармоқларга хос ибора ва гап тузилмаларини тобора кўпроқ ишлата бошлаган. Бу ҳақда The Wall Street Journal ёзмоқда.
Газета Стокгольмда яшовчи Сара Виккерманц мисолида бу ҳолатни ёритган. Унинг айтишича, у яқинда ишдаги учрашувни ўзи сезмаган ҳолда «Бу эрталабки учрашув эмас, бу қайта юкланиш» деган ибора билан бошлаган. Бундай қарама-қарши қўйиш услуби чатботлар тилига хос бўлса-да, Виккерманц нутқини сунъий интеллект ёрдамида тайёрламаган.
У ҳамкорлик қиладиган венчур компания ходимлари ҳам мулоқотда сунъий интеллектга хос қисқа иборалар ва «генеал», «сен жуда ақллисан» каби ортиқча мақтовларни ишлата бошлаганини айтган.
Бундай иборалар ҳатто норасмий номга ҳам эга бўлган — «LLM-измлар». LLM — «катта тил модели» дегани бўлиб, инсон билан мулоқот қилишга ўргатилган сунъий интеллект моделларига нисбатан қўлланади. Айримлар бу услубни машҳур сунъий интеллект модели номи билан «Claude тили» деб ҳам аташмоқда.
Чатботлар оммалашуви натижасида яна бир қарама-қарши тенденция пайдо бўлган. Бу «ғор одами нутқи» деб аталадиган, жуда қисқа ва аниқ, баъзан буйруқ оҳангидаги гапириш услуби.
Масалан, иш учрашувида ходим ўз фикрини батафсил тушунтираётганда, унинг гапини «Мақсад нима?» деган қисқа савол билан бўлишлари мумкин. WSJ бундай услуб сунъий интеллектдан жаҳли чиққан фойдаланувчилар унга берадиган қисқа буйруқларга ўхшашини қайд этган.
Газета Сан-Францискодаги сунъий интеллект стартапларидан бирида ходимларнинг «промпт тилида» гапириш ҳолатлари ҳам ҳисобга олина бошланганини ёзади. Бундай «нутқ хусусиятлари» учун ходимларга балл берилади. Ҳафта якунида энг кўп балл тўплаган ходим ҳамкасбларига кечки овқат олиб беради.
Шу билан бирга, WSJ суҳбатдошларининг айримлари сунъий интеллект аслида бундай тил услубларини бизнес адабиёти ва юридик ҳужжатлардан ўзлаштирганини таъкидлаган. Уларнинг фикрича, бу аввалдан мавжуд бўлган корпоратив нутқ бўлиб, чатботлар уни янада оммалаштириб, кундалик мулоқотга ҳам олиб кирган.
