G7 давлатлари ёқилғи нархларини пасайтириш учун стратегик захираларни очади
G7 давлатлари ёқилғи бозоридаги босимни камайтириш мақсадида стратегик захираларидаги нефть ва нефть маҳсулотларини бозорга чиқаришга келишиб олди.
Франция президенти Эммануэль Макроннинг маълум қилишича, «Катта еттилик» давлатлари стратегик захираларидан 100 миллион баррелгача нефть ва нефть маҳсулотларини бозорга чиқаришни режалаштирмоқда.
Қарор G7 давлатлари раҳбарларининг Макрон бошчилигида ўтказилган видеоконференциясидан сўнг қабул қилинган.
Чиқариладиган маҳсулотларнинг қарийб ярми дизель ёқилғиси бўлади. Унинг катта қисми дастлабки 20 кун ичида бозорга чиқарилиши режалаштирилган. Қолган нефть эса тахминан тўрт ой давомида етказиб берилади.
Макрон аввалроқ АҚШ президенти Дональд Трамп билан телефон орқали ёқилғи нархларининг ошиши масаласини муҳокама қилган. АҚШ Европа давлатларини дизель танқислиги ва нархлар ўсиши шароитида стратегик захираларни тезроқ бозорга чиқаришга чақирган.
Ёқилғи бозоридаги танқисликка АҚШ ва Эрон ўртасидаги можаро сабаб етказиб беришдаги узилишлар, Россия нефть экспортига қўйилган чекловлар ҳамда Хитой томонидан ёқилғи етказиб беришнинг тўхтатилиши таъсир қилгани айтилмоқда.
G7 давлатлари энди захирадаги миллионлаб баррел нефть ва ёқилғини бозорга чиқариш орқали таъминотдаги босимни юмшатишга уринмоқда.
