Урушни якунлаш бўйича АҚШ, Россия ва Украина иштирокидаги уч томонлама музокаралар ноябр ойида тикланиши мумкин
Россия расмийларининг тегишли баёноти ортидан Украина президенти Влодимир Зеленский ҳам бундай музокараларга тайёрлигини маълум қилди.
«Биз Россия бизнинг иштирокимиздаги уч томонлама учрашувни қўллаб-қувватлаши тўғрисида фидбек олдик. Америка томони буни имкон қадар тезроқ амалга оширишни таклиф қилмоқда. Биз буни қўллаб-қувватлаймиз», – деди у баёнотида.
Зеленский эҳтимолий учрашув санасини айтмаган, аммо АҚШ музокараларни яқин вақтлар ичида ўтказиш учун имкон доирасидаги барча ишни қилаётганини таъкидлаган. «Ўйлайманки, ноябр ойи бошидан кечикмайди», – дея қўшимча қилди у.
Зеленский музокарачиларнинг асосий вазифаси, уруши якунланиши ва тинчлик бошланишини яқинлаштиришдан ташқари, етакчилар учрашувига тайёргарлик кўриш эканини қайд этган. Украина президенти Киев музокараларда ҳар қандай оташкесимни (тўлиқ ёки қисман ўт очишни тўхтатиш) қўллаб-қувватлашини айтди.
