Демократлар Трамп оиласи ва унинг атрофидагиларни «сиқиб чиқаришга» тайёрланмоқда
АҚШ Конгрессига оралиқ сайловлардаги ғалабадан сўнг демократлар президент Дональд Трамп ва унинг атрофидагиларга кенг кўламли терговлар билан таҳдид қилди. «Адвокатларни қидираверинг!» — деб ёзди конгрессмен Роберт Гарсия X тармоғида. Сенатор Рон Уайден эса Конгрессдаги эшитувларга чақирув қоғозлари кутилаётгани ҳақида огоҳлантирди. Демократлар 2027 йилнинг январ ойида парламентнинг ҳар иккала палатиси устидан назоратни қўлга киритгач, янги ваколатларидан фойдаланмоқчи.
Терговларнинг асосий йўналишларидан бири Трамп маъмуриятининг миграция сиёсати, жумладан ICE иммиграция хизмати ходимларининг ҳаракатлари ва қўлга олишлар пайтида АҚШ фуқароларининг ҳалок бўлиши ҳолатлари бўлиши мумкин.
Конгрессвумен Делия Рамирес Ички хавфсизлик вазирлигининг собиқ раҳбари Кристи Ноэм, чегара хавфсизлиги учун масъул Том Хоман ва ICE операцион бўлимининг собиқ раҳбари Грегори Бовинони Конгрессга чақирувга тайёргарлик кўришлари кераклигидан огоҳлантирди.
Демократлар, шунингдек, Трамп оиласининг бизнес алоқаларини ва юзага келиши мумкин бўлган манфаатлар тўқнашувини текширишни режалаштирмоқда. Вакиллар палатасининг Назорат қўмитасига раҳбарлик қилиши мумкин бўлган Гарсия биринчи кунларданоқ президент атрофидаги гумон қилинаётган коррупцияни тергов қилиш билан шуғулланишга ваъда берди.
Муҳокама қилиниши мумкин бўлган мавзулар орасида Трамп оиласининг крипто-лойиҳалари, Қатар томонидан ҳадя қилинган 400 миллион долларлик самолёт ва хорижий инвесторлар билан тузилган битимлар бор. Бундан ташқари, демократлар Жеффри Эпштейн иши бўйича материалларни чоп этишда Адлия вазирлигининг ҳаракатларини ҳам ўрганиб чиқмоқчи.
