Хоразмда 72 ёшли эркак хотинини бошини чопиб ташлади
![](https://hordiq.uz/wp-content/uploads/2024/05/img_9728.jpeg)
Хоразмда 1952 йил туғилган фуқаро турмуш ўртоғини болта билан чопиб ташлади. Аёл олган оғир тан жароҳатлари оқибатида вафот этган. Бу ҳақда Олий суд матбуот хизмати Bugun.uzʼга хабар берди.
Қайд этилишича, 2023 йил 16 декабрь куни соат 03:00 ларда А.Х. (эркак)нинг қон босими кўтарилган. У турмуш ўртоғини уйғотиб, унга ёрдам беришини сўраган. Аёл эрига қон босимини тушурувчи укол қилган. Лекин А.Х.нинг қон босими тушмаган. Шу сабабли, у аёлини уни сеҳр-жоду қилганида айблаган ва ундан ким сеҳр-жоду қилишда ёрдам берганини сўраган. Аёл сеҳр-жоду қилмаганлигини айтган. Аммо А.Х. бунга ишонмаган. Унинг жаҳли чиқиб иситиш печи олдида турган болта билан аёлининг бошига 17 маротаба ва чап қўлига 1 марта урган. Аёл олган тан жароҳатлари оқибатида вафот этган.
Судланувчининг кўрсатмасига кўра, ўтган йили унинг бир ўғли вафот этган. Уй-жой ва автомашинасини ногирон ўғлига мерос қилмоқчи бўлган. Aммо бошқа ўғли ундан уй-жойни талаб қилган ва уни ўлдириш билан таҳдид қилган. Шу сабабли айбланувчи А.Х. ўзи билан совуқ қуроллар (пичоқ/болға) олиб юришини таъкидлаган. А.Х. сўнгги кунларда кечалари ухлай олмаслигини, аёли, келинни ва мерос талаб қилувчи ўғли уни сеҳр-жоду қилганини айтган ва айбига иқрор бўлмаган.
Судланувчининг ўғли ва келини суд мажлисида А.Х.га енгиллик беришни сўрашган.
Суд ишида айбланувчи А.Х. Жиноят Кодексининг 97-моддаси (Қасддан одам ўлдириш) 1-қисми билан жиноят содир этган деб топилган. Унга нисбатан 10 йил қамоқ жазоси тайинланган.