Трамп жамоаси Зеленский билан яширин музокаралар ўтказди
Дональд Трамп жамоаси Зеленский билан унинг Оқ уй билан муносабатларини тиклаши учун яширин музокаралар ўтказди. Украина президентини ишонтиришда Буюк Британия бош вазири Кир Стармер ҳам ёрдам берди.
Бу ҳақда CNN телеканали икки манбага таяниб хабар берди. Манбаларга кўра, музокараларда Трампнинг Украина бўйича махсус вакили Кит Келлог ҳам иштирок этган. Трамп маъмурияти вакиллари Украина томонини нодир ер металларига оид битим бўйича музокараларни «иложи борича тезроқ», АҚШ президентининг Конгрессда чиқиш қилишидан олдин қайта тиклашга чақирган.
The Times нашрининг хабар беришича, Украина президентини ишонтиришда Буюк Британия бош вазири Кир Стармер ҳам иштирок этган. Манбаларга кўра, 4 март, сешанба куни Стармер Зеленский билан телефон орқали мулоқот қилган. У суҳбат давомида Зеленскийга «Трамп эшитишни хоҳлаган маълум бир нарсалар борлигини», жумладан, Зеленский Овал кабинетдаги учрашув нотўғри ўтганини тан олиши кераклигини таъкидлаган.
Бунинг ортидан Зеленский ўз саҳифасида пост қолдириб, Оқ уйдаги учрашув «кўзланганидек ўтмаганини» тан олган ва афсус билдирган.
