«Америка овози» сукутга чўмди
АҚШ президенти Доналд Трамп маъмурияти «Америка овози» радиостанциясини молиялаштиришни тўхтатиш тўғрисидаги қарорини тушунтирди.
Оқ уй расмий веб-сайтида 15 март куни кечқурун «Радикал Америка овози» сарлавҳали мақола эълон қилинди. Унда «Америка овози» «радикал тарғибот» олиб боришда, нашр ходимлари эса шахсий ижтимоий тармоқларида «Трампга қарши мазмундаги» материалларни тарқатишда айбланмоқда.
«Президент Доналд Трампнинг фармони… солиқ тўловчиларнинг маблағлари бундан буён радикал тарғибот учун сарфланмаслигини кафолатлайди,» – дейилади Оқ уй баёнотида.
Президент маъмурияти матбуот хизмати нашрнинг собиқ мухбири Ден Робинсоннинг сўзларини келтирмоқда. У ўтган йилнинг ноябрь ойида The Washington Times газетасидаги рукнида «Америка овози» вақт ўтиши билан «аслида чапга моил қарашларни акс эттирувчи манманлик билан тўлган фирибгар ташкилотга айлангани» ҳақида ёзган эди.
Матбуот хизмати «Америка овози»нинг «тарғибот» мисолларидан бири сифатида, хусусан, Трампнинг 2020-йилги сайловолди кампанияси Жо Байденнинг ўғли Хантернинг электрон хатларига «эътибор қаратгани» ҳақидаги мақолани келтиради. Бу хатлар гўёки Байден оиласи АҚШ-Украина муносабатларидан шахсий манфаат кўрганини кўрсатар экан. Шунингдек, матбуот хизмати АҚШдан бошпана сўраётган трансгендер муҳожирлар ҳақидаги лавҳани ҳам мисол қилиб келтиради.
