Афсонавий iPhone 5 «пуф, сассиққа» чиқди!..
Apple яна бир қатор эски қурилмалар рўйхатини янгилади. Компания бу сафар iPhone 4 (8GB) ва iPhone 5 моделларини расман “эскирган” (obsolete) гаджетлар қаторига қўшди.
Компания қоидаларига кўра, сотувдан олинганига 7 йилдан ошган ҳар қандай қурилма эскирган деб ҳисобланади. Шу сабабли, 16 мартдан бошлаб мазкур смартфонлар Apple расмий сервис марказларида таъмирланмайди.
Маълумки, iPhone 5 компания тарихида алоҳида ўринга эга — у Steve Jobs вафотидан кейин тақдим этилган илк iPhone бўлган. Ушбу модел 2018 йилдаёқ “винтаж” қурилмалар рўйхатига киритилган ва таъмирлаш имконияти чекланган эди.
iPhone 4 (8GB) эса 2011 йилда тақдим этилган бўлиб, унинг 8 ГБ версияси бошқа вариантлардан кейинроқ бозорга чиққан. Қурилма 2013 йилда ишлаб чиқаришдан тўлиқ олиб ташланган.
Манбаларга кўра, ушбу моделлар ривожланаётган давлатларда узоқ вақт сотилгани учун уларни эскирган қурилмалар рўйхатига киритиш бироз кечиккан.
Эслатиб ўтамиз, 2025 йил июль ойида ҳам Apple бир нечта Mac компьютерлари, iPhone ва iPad моделларини ушбу рўйхатга қўшган эди. Жумладан, Mac Pro (2013), 2019 йилги MacBook Air, iMac ва бир қатор iPad Pro моделлари ҳам эскирган қурилмалар қаторига киритилган.
