Нетаньяху: «Эрон энди уранни бойитиб, ракета ишлаб чиқара олмайди»
Эрон ҳозирда уранни бойитиш ёки баллистик ракеталар ишлаб чиқариш имкониятига эга эмас.
Бу ҳақда Исроил Бош вазири Беньямин Нетаньяху журналистлар билан суҳбатда таъкидлаган.
У Эрон энди «ҳар қачонгидан ҳам заифроқ» эканлигини айтди. Нетаняху Ислом Республикасига қарши операция зарур бўлган вақтгача давом этишини таъкидлади.
«Хаманей ер остида ракета ва ядровий дастурларни қайта тиклашни буюрди. Биз нафақат қолган ракеталарни йўқ қилиш, балки ушбу дастурларни қўллаб-қувватловчи иншоотларни ҳам йўқ қилиш учун ҳаракат қилмоқдамиз. Ва энди, 20 кундан кейин, мен сизга Эрон уранни бойитиш ёки баллистик ракеталар ишлаб чиқариш имкониятига эга эмаслигини айта оламан», деди Исроил бош вазири.
У шунингдек, Эронда ер усти операциясини истисно қилмади: «Инқилобларни ҳаводан амалга ошириш мумкин эмас. Биз ҳаводан кўп иш қиламиз, лекин ер усти компоненти ҳам бўлиши керак – мен барча вариантларни ошкор қилмайман.»
