«Мана қўлимни бераман! Баттар бўлсин!..»

«Ман Сити» мураббийи «Арсенал»га қарши ўйиндан олдин: «Агар «Арсенал» ютса, унинг мураббийини — ўз шогиртимни қўлини сиқиб, чемпионлик билан табриклайман», деган эди. Лекин амалда бундай бўлмади. У шогиртининг «шохини қайириб» қўйди.

Бундан чиқдики, у аввалги гапларни айтишдан олдин ичида: «Барибир у мени ва менинг жамоамни енга олмайди. Ҳали унга шундай томошалар кўрсатайки, бунақасини тушида ҳам кўрмаган бўлсин», деган қатъий ишонч ва рақобат кайфиятида бўлган.

Сабаби, Гвардиола ва унинг тажрибали футболчилари чемпионлик шаробини ичиб кўрган бўлса-да, жамоага янги келган ёш ўйинчилар чемпионлик нима эканлигини ҳали тўлиқ билишмайди. Агар бу йил зафар қучишмаса, уларнинг бундай бахтни ҳис қилишлари учун яна кўп вақт кетиши, балки баъзилари бундай нашъадан умуман бебаҳра қолиши ҳам эҳтимолдан холи эмасди. Мана шуларни ўйлаган Гвардиола, нима қилиб бўлмасин, ғалаба қозониш кераклигини аллақачон англаб етганди.

У ниятига етди — «Арсенал»ни тиз чўктирди. Энди чемпионлик тақдири фақат «Ман Сити»нинг ўз қўлида!