Муниса Ризаева келаси йил мухлислари учун катта концерт дастури тайёрламоқда

Таниқли хонанда Муниса Ризаева сўнгги интервьюларидан бирида ижодий режалари ҳақида очиқчасига сўз юритди. Унинг маълум қилишича, катта концерт дастурини ташкил этиш устида иш бошланган бўлиб, мазкур шоуни келгуси йилга мўлжалламоқда.

Санъаткорнинг таъкидлашича, ҳозирги вақтда у кўпроқ оиласига эътибор қаратмоқда. “Худо хоҳласа, келаси йилга концерт дастуримни режалаштиряпман. Чунки бир ярим йил олдин она бўлганман. Ҳозир эса асосий вақтимни фарзандим ва оиламга бағишлаяпман”, — деди у.

Хонанданинг айтишича, фарзанди бироз каттароқ бўлганидан сўнг, у яна саҳнага қайтиб, мухлисларига унутилмас ва юқори даражадаги шоу тақдим этишни режалаштирмоқда. “Илоҳим, ўғлим каттароқ бўлса, Худо хоҳласа, жуда ҳам чиройли, катта концерт дастури билан мухлисларимни қувонтириш ниятим бор”, — дея қўшимча қилди у.

Мухлислар эса бу янгиликни илиқ кутиб олиб, хонанданинг тезроқ катта саҳнага қайтишини интизорлик билан кутмоқда.