Макрон маъмурияти “ҳазил” деган воқеа ортида бошқа сабаб бўлгани айтилмоқда
Эммануэл Макрон ва унинг рафиқаси Брижит Macron иштирок этган видео яна муҳокамалар марказига чиқди. Франциялик журналист Флориан Тардиф ўзининг “(Деярли) мукаммал жуфтлик” номли китобида ушбу ҳолат ортида эронлик актриса Голшифтеҳ Фараҳани билан боғлиқ ёзишмалар турганини даъво қилди.
Муаллифнинг ёзишича, 2025 йили Вьетнам сафари вақтида Брижит Макрон турмуш ўртоғининг телефонида актрисадан келган хабарларни кўриб қолган. Китобда айтилишича, айнан шу вазият жуфтлик ўртасида кескин тортишувга сабаб бўлган ва у камералар томонидан тасвирга олинган.
Флориан Тардиф RTL France телеканалига берган интервьюсида Макрон ва Голшифтеҳ Фараҳани ўртасида маълум вақт давомида мулоқот бўлганини айтган. Китобда президентнинг актрисага юборган айрим илиқ мазмундаги хабарлари ҳам тилга олинади.
Le Parisien нашри маълумотига кўра, Фараҳани ва Макрон ўртасидаги муносабат “платоник мулоқот” сифатида баҳоланган. Бироқ журналистнинг фикрича, бу ҳолат Брижит Макронда ранжиш ва ўзини четга сурилгандек ҳис қилиш туйғусини уйғотган.
Шу билан бирга, Франция биринчи хоними вакиллари ушбу даъволарни рад этди. Улар Брижит Макрон ҳеч қачон эрининг телефонини текширмаслигини таъкидлаган. Голшифтеҳ Фараҳани ҳам бу каби миш-мишларга муносабат билдириб, айрим одамлар “сунъий романтик ҳикоялар тўқишини” айтган.
Воқеа илк бор оммага тарқалганида, Макрон маъмурияти буни жуфтлик ўртасидаги ҳазил сифатида изоҳлаган эди. Президентнинг ўзи ҳам ҳолатни оддий ҳазил деб атаб, жамоатчиликни турли тахминларга берилмасликка чақирган.
