Xiaomi флагман смартфонлари нархи 1500 долларгача кўтарилиши мумкин
Xiaomi компанияси президенти Лу Вейбин яқин келажакда юқори тоифадаги смартфонлар нархи сезиларли даражада ошиши ҳақида огоҳлантирди. Унинг сўзларига кўра, 2026-йил охирига келиб Хитой бозорида флагман қурилмаларнинг нархи 10 000 юан, яни тахминан 1500 доллардан ошиб кетиши эҳтимоли юқори. Бу ҳақда Ixbt.com хабар беради.
Нархларнинг бундай ўсишига асосий сабаб сифатида хотира компонентлари нархининг қимматлашуви кўрсатилмоқда. ДRAM ва НАНД-флеш хотира нархлари кескин ошган бўлиб, смартфон ишлаб чиқарувчилари ушбу харажатларни қоплашда қийинчиликларга дуч келмоқда. Хусусан, Xiaomi 17 Max каби бўлажак моделлар нархи ҳали ҳам компания ичида муҳокама қилинмоқда.
Лу Вейбиннинг таъкидлашича, хотира ишлаб чиқариш қувватларини кенгайтириш узоқ вақт талаб қиладиган жараён. Янги завод қурилиши ва оммавий ишлаб чиқаришни йўлга қўйиш бир неча йилни олади, шу билан бирга сунъий интеллект серверлари ва юқори унумдор ҳисоблаш ускуналари учун хотирага бўлган талаб тез суръатлар билан ўсиб бормоқда.
Мутахассиснинг фикрича, хотира бозоридаги нарх босими 2027-йилгача, эҳтимол 2028-йилга қадар сақланиб қолиши мумкин. Бу эса бутун смартфон саноатида нархлар сиёсатининг ўзгаришига ва флагман қурилмалар сегментининг қимматлашувига олиб келади.
