Жангу жадал ёмон авжига чиқмоқда!..
Ўтган ҳафтада Россия Қуролли Кучлари Махсус ҳарбий операция (МҲО) бошланганидан бери Украинанинг ҳарбий инфратузилмасига энг кучли ракета ва дрон зарбаларидан бирини берди. Мамлакатнинг 56 та туманидаги, жумладан, Закарпатьедаги нишонларга ҳужум қилинди. Бир сутка давомида 1,5 мингдан ортиқ зарбадор дронлар ва деярли барча турдаги ракеталар — «Искандер»дан тортиб, товушдан тез учувчи «Кинжал»ларгача ишга солинди. Онсиз ҳам заифлашган Украина ҳаво ҳужумидан мудофаа (ҲҲМ) тизими ҳеч нарса қила олмади. Шу билан бир вақтда, Донецк Халқ Республикасининг ғарбий қисмида кенг кўламли ҳужум бошланди. Тафсилотлар — «Известия» ҳарбий мухбири Эмиль Тимашевнинг Пётр Марченко билан олиб бориладиган «Якуний дастур» учун тайёрлаган репортажида.
Украина Қуролли Кучлари (УҚК) ўз одамларини ўлимга жўнатмоқда
Константиновканинг шимолий атрофида олинган эксклюзив кадрларда УҚК кичик гуруҳлар билан шаҳарга сизиб киришга уринаётгани кўринади. Яхши жиҳозланган икки жангари бир уйдан бошқасига тез ҳаракат қилиб, кўздан ғойиб бўлишга уринмоқда, бироқ улар 4-мотоатқишлар бригадасининг аэроразведкаси томонидан аллақачон пайқаб бўлинганини хаёлларига ҳам келтиришмаяпти. Улар ғиштли уйга яширинишган ва шу заҳоти тузоққа тушишган. Кейинги иш эса зарбадор дронлар ва артиллерияга қолади.
Орадан бир соат ҳам ўтмай, УҚК яна ўз одамларини ўлимга жўнатади. Бу сафар тўрт кишини.
«Душманнинг жонли кучлари қандай ҳаракатланаётганини кузатяпмиз. Оғир сумкаларига қараганда, эҳтимол, қандайдир махсус ускуналарни ташишмоқда», — деб кўрсатди ҳарбий мухбир.
Қурол-яроғ ва техника ортилган аравалар гўёки парвозлар тақиқланган ҳудуддек тўғридан-тўғри йўлда очиқчасига ғилдиратиб олиб ўтилмоқда. Бироқ, бу саёҳат узоқ давом этмади.
«Жанубий» гуруҳ жангчилари Константиновка устидан назоратни қўлга киритмоқда
«Бу ерда осмон бизники, чунки биз Константиновкадан Дружковкагача бўлган барча таъминот ва яқинлашиш йўлларини дронлар орқали тўлиқ назорат қилиб турибмиз», — деди 4-мотоатқишлар бригадаси танк батальони взвод командири («Лимб» чақирув белгиси билан).
Киев режими раҳбари Владимир Зеленскийнинг Дружковкадан туриб украиналикларни тинчлантиришга уринаётган анъанавий видеоси бор. Ушбу ёзув март ойида қилинган эди, ҳозир эса бу майдон устидан ҳам, шаҳарнинг ўзи устидан ҳам бизнинг учувчисиз учиш аппаратларимиз (дронлар) бемалол учиб юрибди.
Константиновка олов ичида: бирорта ҳам бутун бино қолмаган. Бир вақтлар гавжум бўлган турар жой мавзелари Украина гарнизонининг қолдиқлари бошпана топишга уринаётган вайронага айланган.
Россия армияси Дружковка, Краматорск ва Славянскни қуршовга олмоқда
Ҳужум кампанияси тобора кучайиб бормоқда, Россия қўшинлари олдинга интилишда давом этиб, бир йўла учта муҳим шаҳарни — бутун шимолий Донбасснинг ягона йирик транспорт-логистика марказини ташкил этувчи Дружковка, Краматорск ва Славянскни қуршовга олмоқда. Бу марказнинг калити айнан Константиновка ҳисобланади. Шу болатдан Киев одамларни аямай, захираларни шу ерга тортмоқда ва фронтнинг бошқа ҳудудларидаги флангларини очиқ қолдирмоқда. Оқибатда эса душманнинг Славянск йўналишидаги мудофааси парчаланиб кетди.
Кривая Лука қишлоғи устида Россия байроғини 7-мотоатқишлар бригадаси жангчилари кўтаришмоқда. «Душман қаршилик кўрсатишга уринди, аммо биз уларни тор-мор этдик. Улар асосан таянч пунктларида ўтириб, кутишмоқда», — деди Россия Қуролли Кучлари 7-мотоатқишлар бригадаси бўлинма командири («Химик» чақирув белгиси билан).
УҚК мудофааси кўз ўнгимизда парчаланиб бормоқда
Славянск яқинидаги кичик бир қишлоқнинг озод қилиниши Киевда хавотир билан кутиб олинди. УҚК позицияларини жуда тез топширмоқда — мудофаа кўз ўнгимизда қуламоқда. Ҳозирда жанглар Николаевка ва Рай-Александровка атрофида бормоқда. Славянсккача тахминан 10 километр қолди. Бу дегани, бизнинг қўшинларимиз муҳим трассаларни назорат остига олиб, рақиб техникасини ишдан чиқармоқда.
Ҳар ҳафта УҚК 1000 га яқин одамини йўқотмоқда. Бош қўмондон Александр Сырский, афтидан, бутун умидини йўқотиб, очиқдан-очиқ террор йўлига ставка қилмоқда. «Бизнинг кучли томонимиз — Россиянинг ичкарисига зарба беришдир. Кичик кучлар билан зарар етказамиз», — деди у.
Айни пайтда эса, ўлимга ташлаб кетилган кечаги Украина чақирилувчилари жангларда тобланган Россия армияси билан юзма-юз қолмоқдалар. Уларни ҳимоя қиладиган ҳеч ким йўқ. Славянскнинг ортида эса кенг дашт ва чексиз далалар бўлиб, у ерда энди яширинишнинг иложи йўқ.
