Эронда узоқ узилишдан кейин интернет қисман тикланди

Эронда узоқ давом этган умумхалқ интернет узилишидан сўнг тармоққа уланиш қисман тикланди. Бу ҳақда NetBlocks маълум қилди.

Ташкилот маълумотларига кўра, интернетга кириш имконияти узилишнинг 88-кунида қисман тиклана бошлаган. NetBlocks бу замонавий тарихдаги энг узоқ давом этган умумхалқ интернет ўчирилиши бўлганини қайд этган.

Шу билан бирга, ташкилот интернет тикланиши барқарор бўладими ёки йўқми, ҳозирча номаълум эканини билдирган.

Эрондаги айрим фуқаролар мобил интернет ҳануз ишламаётганини айтган. Уларнинг сўзларига кўра, Wi-Fi орқали уй интернети тикланган, бироқ айрим ижтимоий тармоқларга кириш учун ҳамон VPN талаб қилинмоқда.

Эронда интернет уруш бошланганидан кейин ўчириб қўйилган. Бу чекловлар 8 январдан буён давом этаётган ҳукуматга қарши оммавий намойишлар фонида жорий этилган аввалги чекловларнинг давоми бўлган.

Фаолларга кўра, январдаги интернет узилиши норозилик намойишлари ҳақидаги маълумотлар тарқалишини чеклаш ва янги акцияларни ташкил этишга тўсқинлик қилиш мақсадида амалга оширилган.

Ҳуқуқ ҳимоячилари намойишларни бостириш вақтида кўплаб одамлар ҳалок бўлганини маълум қилган.