Колумбия Президенти Трампни сайловларга аралашишда айблади
Колумбия Президенти Густаво Петро АҚШ Президенти Дональд Трампни мамлакатдаги президентлик сайловларига аралашишда айблади. Бу ҳақда у CBS News телеканалига берган интервьюсида маълум қилди.
Петрога кўра, Трамп Колумбиядаги ўнг қанот номзоди Абелардо де ла Эсприэльяни очиқ қўллаб-қувватлаб, мамлакат ички ишларига аралашган. АҚШ раҳбари сайловнинг иккинчи тури арафасида эълон қилган баёнотида мазкур номзодни “тўлиқ ва шартсиз қўллаб-қувватлаши”ни билдирган ҳамда овоз бериш натижалари Колумбия ва АҚШ ўртасидаги муносабатлар келажаги учун катта аҳамиятга эга эканини таъкидлаган.
Густаво Петро бу ҳолатни давлат суверенитети тамойилларининг бузилиши деб баҳолаб, Вашингтон ўз фикрича наркотрафик ва ўта ўнгчи гуруҳлар билан боғлиқ кучларни қўллаб-қувватлаётганини айтган.
Колумбия раҳбари АҚШ билан муносабатлардаги тарангликни ўзининг сўл қарашлари ҳамда Трамп маъмурияти билан халқаро масалалар, жумладан Ғазо секторидаги вазият бўйича келишмовчиликлар билан ҳам изоҳлаган.
Петронинг интервьюси президентлик сайловларининг биринчи туридан бир неча кун ўтгач эфирга узатилди. Унда ўнг қанот номзоди Абелардо де ла Эсприэлья 43,7 фоиз овоз олган бўлса, сўлчи сенатор Иван Сепеда 40,9 фоиз овоз тўплаган. Сайловнинг иккинчи тури икки ҳафтадан кам вақт ичида бўлиб ўтади.
Колумбия Президенти ўнг кучлар ғалаба қозонса, мамлакатда сиёсий зўравонликнинг янги тўлқини юзага келиши мумкинлигидан огоҳлантирган. Унинг сўзларига кўра, жамиятдаги чуқур сиёсий қутблашув шароитида агрессив сиёсий риториканинг кучайиши хавфли вазиятни юзага келтирмоқда.
“Колумбияда нафрат жуда тез ўлимларга олиб келади”, деган Петро.
