Янги Наманганда IT-парк қурилишига старт берилди
Президент Шавкат Мирзиёев Давлатобод туманидаги Янги Наманган шаҳарчасида барпо этиладиган IT-парк қурилишига тамал тоши қўйиш маросимида иштирок этди. Давлат раҳбари рақамлаштириш ва сунъий интеллект технологияларини ривожлантириш Янги Ўзбекистон ислоҳотларининг устувор йўналишларидан бири эканини таъкидлади.
Қайд этилишича, Наманган вилоятига йил бошидан буён 2 миллиард долларлик хорижий инвестиция жалб қилинган. Шунингдек, Хитой, Туркия, Ҳиндистон ва Россия ҳамкорлигида ташкил этилган 1 миллиард 800 миллион долларлик 20 та янги лойиҳа ишга туширилмоқда.
Ушбу қувватлар фармацевтика, енгил саноат, электротехника, қурилиш материаллари, озиқ-овқат ва кимё саноати соҳаларида 6,5 мингта янги иш ўрни яратиш имконини беради. Шу билан бирга, иқтисодиётга 3 триллион 600 миллиард сўмлик айланма, 200 миллион долларлик экспорт ва бюджетга 400 миллиард сўмлик қўшимча тушум келтириши кутилмоқда.
Президент Наманган аҳолисининг 1 миллион 600 мингдан ортиғини ёшлар ташкил этишини алоҳида таъкидлаб, уларни ахборот технологиялари ва сунъий интеллект соҳаларига кенг жалб қилиш муҳимлигини қайд этди.
Маълум қилинишича, Хитойлик ҳамкорлар билан амалга оширилаётган 117 миллион долларлик йирик лойиҳа доирасида Янги Наманган, Самарқанд, Чирчиқ, Нурафшон, Урганч ва Навоий шаҳарларида IT-парклар қурилади. Янги Наманган мажмуаси мазкур ташаббуснинг биринчи лойиҳаси ҳисобланади.
1,7 гектар майдонда қуриладиган 17 қаватли бинода таълим ва экспорт марказлари, коворкинг ва офис ҳудудлари, стартап акселератори ҳамда хорижий компанияларга хизмат кўрсатиш инфратузилмаси жойлаштирилади. Мажмуа ягона IT экотизими сифатида фаолият юритиши режалаштирилган.
Майдони қарийб 18 минг квадрат метр бўлган IT-паркда Наманган вилоятининг 2 мингга яқин ёши юқори даромадли иш билан таъминланади. Бу эса маҳаллий кадрлар салоҳиятини ошириш ва экспортбоп хизматлар ҳажмини кўпайтиришга хизмат қилади.
Расмий маълумотларга кўра, лойиҳа ишга тушгач, вилоятда ахборот технологиялари хизматлари йиллик ҳажми 500 миллиард сўмга, соҳа экспорти эса 30 миллион долларга етиши кутилмоқда.
Маросим якунида Президент хорижий ҳамкорларга миннатдорлик билдириб, Янги Наманган IT-парки қурилишига расман старт берди.
