Путиннинг махфий севгилиси ҳақида хабар берган журналист «заҳарли қўзиқорин» еб вафот этди

Ўзини Владимир Путиннинг «шахсий душмани» деб атаган россиялик журналист заҳарли қўзиқорин истеъмол қилганидан кейин вафот этгани хабар қилинмоқда. 69 ёшли Григорий Нехорошев 2008 йилда Владимир Путиннинг олимпиада чемпиони гимнастикачи Алина Кабаева билан муносабатда экани ҳақидаги илк мақолани чоп этган газета муҳаррири бўлган.

The Sun нашрининг, Латвиянинг Delfi нашрига таяниб хабар беришича, Нехорошев Латвиянинг Рига шаҳридаги уйида ўлик ҳолда топилган. Маълумотларга кўра, у ўз боғидан териб олган қўзиқоринларни истеъмол қилганидан кейин вафот этган.

У Путин ва Кабаева ўртасидаги муносабатлар ҳақидаги мақола чоп этилганидан сўнг, унинг «Московский корреспондент» газетаси ёпиб қўйилгани сабабли Россиядан кетишга мажбур бўлган.

Путин ўша пайтда бу муносабатлар ҳақидаги даъволарни рад этган ва Нехорошевнинг ўлими Кремл билан боғлиқ эканини тасдиқловчи ҳеч қандай далил мавжуд эмас. Шунга қарамай, бу воқеа собиқ олимпиада гимнастикачиси Алина Кабаевага оид узоқ йиллардан бери давом этиб келаётган миш-мишларга яна бир бор эътибор қаратди.