Путиннинг эски сафдошларидан бири вафот этди
Бугун, 26 июнь куни Россия собиқ мудофаа вазири ва президент администрациясининг собиқ раҳбари Сергей Иванов 73 ёшида вафот этди. Бу ҳақда у фахрий президент бўлган ВТБ Бирлашган лигаси маълум қилди.
Иванов – Путин даврининг энг кўзга кўринган россиялик мулозимларидан бири эди. У Ленинградда туғилган, Ленинград давлат университетининг филология факультетини, сўнгра Минскдаги ДХҚ (КГБ) Олий курсларини ва СССР ДХҚ Қизил байроқли институтини тамомлаган. 1970-йилларнинг ўрталаридан бошлаб Иванов давлат хавфсизлик органларида хизмат қилган, жумладан, хорижда ҳам ишлаган, Владимир Путин билан эса Ленинград ДХҚ тизимида ишлаб юрган кезлариданоқ таниш бўлган.
1990-йилларнинг охирида, ФХХга Путин раҳбарлик қилган даврда Иванов унинг ўринбосари бўлган. Путин ҳокимият тепасига келгач, у Хавфсизлик кенгаши котиби лавозимини эгаллаган, 2001 йилда эса мудофаа вазири бўлган. Кейинчалик Иванов ҳукуматда бош вазир ўринбосари ва биринчи ўринбосари сифатида мудофаа-саноат мажмуасини назорат қилган, 2011–2016 йилларда эса президент администрациясига раҳбарлик қилган.
2007 йилда Иванов Путиннинг президентлик лавозимидаги энг эҳтимолий ворисларидан бири сифатида тилга олинган эди, бироқ якунда ҳокимият номидан Дмитрий Медведев номзод қилиб кўрсатилди.
Президент администрациясидан кетганидан сўнг, Иванов 2016 йилдан бошлаб президентнинг табиатни муҳофаза қилиш, экология ва транспорт масалалари бўйича махсус вакили лавозимида ишлаб келди. 2026 йилда Путин уни ушбу лавозимдан озод қилди, сўнгра Хавфсизлик кенгаши таркибидан чиқарди.
Иванов АҚШ, Буюк Британия, Европа Иттифоқи ва бошқа бир қатор давлатларнинг санкциялари рўйхатига киритилган эди.
