Дунёдаги энг йирик криптобиржа Европа Иттифоқини тарк этмоқда
Binance Европа бюрократияси ва чўзилиб кетган лицензиялаш жараёнига дош беролмай, Европа Иттифоқидаги фаолиятини қисқартирмоқда.
Дунёдаги энг йирик криптовалюта биржаси Binance 1 июлдан бошлаб Европа Иттифоқи мамлакатларидаги мижозларга хизмат кўрсатишни тўхтатади. Бу ҳақда компания Франция, Польша, Италия ва Испаниядаги фойдаланувчиларига юборган билдиришномада маълум қилди.
Бундай қарорга Европа бозорида фаолият юритиш учун зарур бўлган MiCA лицензиясининг мавжуд эмаслиги сабаб бўлди. Барча криптокомпаниялар 30 июнга қадар ушбу рухсатномани олиши шарт эди.
Binance лицензия олиш учун Грецияда ариза топширган эди, аммо 24 июнь куни уни кўриб чиқиш муддати чўзилиб кетгани сабабли аризасини қайтариб олди. Компания таъкидлашича, бу қарор фойдаланувчилар учун вазиятни янада ойдинлаштириш ва Европадаги узоқ муддатли стратегиясини сақлаб қолишга хизмат қилади.
Reuters маълумотига кўра, бундан аввал биржа Латвия ва Ирландия регуляторлари билан келишувга эришишга уриниб кўрган, аммо бу самара бермаган. Financial Times хабар беришича, энди Binance Францияда лицензия олишга ҳаракат қилади.
Компания мижозлар маблағлари хавфсиз сақланиши ва улардан ҳеч қандай чекловларсиз фойдаланиш мумкинлигини маълум қилди.
