Бодринг ҳақиқатан ҳам фойдасизми? Мутахассислар нима дейди?

Кўпчилик бодрингни таркибининг асосий қисми сувдан иборат бўлгани учун унча фойдали эмас, деб ҳисоблайди. Ҳатто айримлар уни салатда фақат жой эгаллайдиган маҳсулот сифатида баҳолайди. Бироқ бу фикр тўлиқ ҳақиқат эмас. Гарчи бодринг витамин ва минералларга энг бой сабзавотлар қаторига кирмаса-да, унинг организм учун маълум даражада фойдаси бор.

100 грамм янги бодрингда атиги 16 килокалория мавжуд. Шу боис у парҳез тутаётганлар ва вазнини назорат қилувчилар учун яхши танлов ҳисобланади. Бодрингнинг қарийб 95 фоизи сувдан ташкил топгани сабабли, у организмдаги суюқлик мувозанатини сақлашга ҳам ёрдам беради.

Бодринг таркибида К витамини, С витамини, калий, фосфор ва магний каби муҳим озуқа моддалари бор. Улар миқдор жиҳатидан кўп эмас, аммо мунтазам истеъмол қилинганда организмга маълум даражада ҳисса қўшади. Айниқса, бодрингни пўстлоғи билан ейиш озуқа моддаларини кўпроқ олиш имконини беради.

Мутахассисларнинг таъкидлашича, бодринг иссиқ кунларда организмни қўшимча суюқлик билан таъминлашга ёрдам беради. Шунингдек, у енгил тамадди сифатида очлик ҳиссини камайтириши ва кам калорияли овқатланишга ёрдам бериши мумкин.

Бодринг таркибидаги сув овқат ҳазм қилиш тизими фаолиятини қўллаб-қувватлайди. Етарли суюқлик қабул қилиниши озуқа моддаларининг яхши ўзлаштирилишига ёрдам беради, ич қотишининг олдини олишга хизмат қилади ва ичаклар фаолиятини яхшилайди.

Шу билан бирга, бодринг организмни токсинлардан тозалайди, деган қараш илмий жиҳатдан исботланмаган. Инсон организмида зарарли моддаларни чиқариш вазифасини асосан жигар, буйраклар, ичак ва ўпка бажаради. Бодринг эса бу жараённи мўъжизавий тарзда тезлаштирмайди.

Хулоса қилиб айтганда, бодрингни суперфуд деб атаб бўлмайди. Бироқ у кам калорияли, серсув ва фойдали озуқа моддаларини маълум миқдорда ўз ичига олган сабзавот бўлиб, соғлом овқатланиш рационининг бир қисми сифатида бемалол истеъмол қилиниши мумкин.