Францияда президентлик сайловлари санаси маълум бўлди
Францияда 2027 йилда бўлиб ўтадиган президентлик сайловлари муддатлари белгиланди. Сайловнинг биринчи тури 2027 йил 18 апрелда, иккинчи тури эса 2 майда ўтказилади.
Бу ҳақда Франция матбуоти ҳукуматга яқин манбаларига таяниб хабар бермоқда.
Қайд этилишича, Франция президенти Эммануэль Макрон кетма-кет икки муддат президентлик лавозимини эгаллагани сабабли, бу сафар ўз номзодини қайта қўя олмайди.
Францияда президентлик сайловлари икки турдан иборат. Агар биринчи турда номзодларнинг ҳеч бири 50 фоиздан кўп овоз тўплай олмаса, энг кўп овоз олган икки номзод иккинчи турда курашни давом эттиради.
2027 йилги президентлик сайловларида ўта ўнгчи «Миллий бирлик» (RN) партияси раиси Жордан Барделла асосий номзодлардан бири сифатида кўрилмоқда. Жамоатчилик фикри сўровномаларига кўра, унинг биринчи турдан муваффақиятли ўтиб, сайлов фаворитларидан бирига айланиши кутиляпти.
«Миллий бирлик» партиясининг парламентдаги фракцияси раҳбари Марин Ле Пеннинг номзоди эса коррупция иши бўйича судлангани ва унга қўйилган 5 йиллик сиёсий фаолият тақиқи юзасидан апелляция жараёни қандай якунланишига боғлиқ бўлади. Ушбу иш бўйича якуний қарор 7 июль куни эълон қилиниши кутилмоқда.
Шунингдек, собиқ ички ишлар вазири Бруно Ретайо ва Франциянинг собиқ президенти Франсуа Олланд ҳам президентликка номзоди кўрсатилиши мумкин бўлган сиёсатчилар сирасига киради.
