Пул ювишда айбланиб, қамалган Перунинг собиқ президент озодликка чиқарилди — Reuters

Олянта Ҳумала Перу Конституциявий суди унинг пул ювиш бўйича 15 йиллик қамоқ жазосини бекор қилганидан кейин қамоқдан озод этилди, дея хабар бермоқда агентлик.

Қайд этилишича, Ҳумала кеча, 31 июл куни кечқурун бир неча собиқ президентлар сақланаётган махсус жазони ижро этиш муассасасидан озод қилинган. У 2011 йилги президентлик сайлови кампанияси давомида Бразилиянинг Odebrecht (ҳозирги Novonor) қурилиш компаниясидан ноқонуний маблағ олганликда айбланиб, ўтган йили ҳукм қилинган эди.

Прокуратура Ҳумаланинг озод этилиши юзасидан изоҳ бермаган. Иш бўйича Ҳумаланинг турмуш ўртоғи Надин Эредиа ҳам қамоқ жазосига ҳукм қилинган эди. Бироқ у Бразилия Президенти Луис Инасиу Лула да Силва томонидан бошпана берилгач, Бразилияда яшамоқда.

Бу иш Odebrecht компаниясининг Лотин Америкасидаги коррупциявий фаолияти бўйича кенг кўламли терговнинг бир қисми бўлиб, Перу сиёсий элитасининг кўплаб вакилларини қамраб олган. Шу ҳафта президентлик лавозимига киришган Кейко Фухимори ҳам мазкур компания билан боғлиқ эҳтимолий сайлов маблағлари юзасидан тергов қилинган эди. Конституциявий суд ўтган йили унга нисбатан ишни ҳам бекор қилган.