Зеленский: АҚШ Украинага ҳар ойда ҳаво мудофааси ракеталарини етказиб беради

Украина АҚШдан ҳаво мудофааси тизимлари учун ракеталар олиш бўйича келишувларга эга. Бу ҳақда Украина президенти Владимир Зеленский Сербия президенти Александар Вучич билан қўшма матбуот анжуманида маълум қилди.
«Аввало, ракетага қарши ракеталар ва тизимлар ишлаб чиқарувчиси ким? Бу, биринчи навбатда, Америка Қўшма Штатлари. Улар ёрдам бера оладими? Биз ишлаяпмиз… Улар ҳар ой бизга ракеталар ажратадими? Ҳа. Бизда келишувлар бор», — деди Зеленский.

Шу билан бирга, у ракеталар миқдори етарли бўлмаслигини таъкидлади, аммо ҳар ой қанча ракета етказиб берилиши ҳақида аниқ маълумот бермади.

Зеленский ушбу келишувларга қачон эришилганини ҳам айтмади. Бир қатор ОАВ унинг сўзларини Украинага айнан «Patriot» ҳаво мудофааси тизимлари учун ракеталар етказиб берилиши ҳақидаги баёнот сифатида талқин қилди. Украина президенти аввал ҳам «Patriot» ракеталари танқислиги ҳақида бир неча бор гапирган.

Бироқ Зеленский ўз нутқида қайси турдаги ракеталар ҳақида гап кетаётганини аниқ айтмади.