Ливан ўлим жазосини бекор қилди
Ливан парламенти 11 август куни ўлим жазосини бекор қилди. Шундай қилиб, мамлакат ўлим жазосини оғир меҳнат билан умрбод қамоқ жазосига алмаштирган араб дунёсидаги биринчи мамлакатга айланди.
Ушбу мамлакат 2004 йилнинг январ ойидан бери қатлларни амалга оширмай келаётган эди. Бу вақт давомида ўнлаб ўлим ҳукмлари чиқарилган, бироқ кейинчалик улар тўхтатилган ёки бошқа жазога алмаштирилган.
Ливан парламентининг 128 нафар аъзосидан кўпчилиги ўлим жазосини бекор қилиш учун овоз берди. Фақат “Ҳизбуллоҳ” парламент фракцияси бунга қаршилик билдирди. Адлия вазири Одил Нассар буни мамлакат учун “тарихий қадам” деб баҳолади.
Янги жазо — оғирлаштирилган оғир меҳнат қандай амалга оширилиши ҳозирча номаълум. Айрим депутатларнинг айтишича, янги жазонинг шартлари ҳали аниқ эмас. Ливанда оғир меҳнат жазоси қонунларда ва суд қарорларида бор. Лекин молиявий муаммолар ҳамда қамоқхоналарнинг тўлиб кетгани сабабли бу жазо ҳам сўнгги йилларда камдан кам қўлланган.
Ўлим жазосининг бекор қилиниши парламентда умумий афв ҳақидаги баҳсли қонун муҳокама қилинаётган бир пайтда юз берди. Бу 1990 йилда 15 йиллик фуқаролар уруши тугаганидан бери энг йирик афв ҳисобланади. Қонун муайян истиснолардан ташқари, судланган жангарилар ва гиёҳванд моддалар сотувчиларининг жазосини енгиллаштириши ёки уларни озод қилиши мумкин.
