Ливанда Исроил ҳужумлари қурбонлари сони 4,3 мингдан ошди
Ўт очишни тўхтатиш бўйича келишувларга қарамай, Исроилнинг Ливан жанубига берган зарбалари давом этмоқда.
Набатия ҳудудида яна бир зарба берилди. Исроил дрони икки нафар ёш ливанлик бўлган мотоциклга ҳужум қилди. Иккиси ҳам ҳалок бўлди, транспорт воситаси эса ёниб кетди. Ливан Миллий ахборот агентлиги (NNA) Дейр ҳудуди ва Набатиянинг бошқа районларига ҳам ҳаво зарбалари берилганини хабар қилди.
Бу ҳужумлар Ливан жанубида вазиятнинг кескинлашуви давоми бўлди. Фақат 7 сентябрь куни Исроилнинг Кфар-Румманга берган зарбалари оқибатида камида 12 киши ҳалок бўлди. Улар орасида икки нафар бола ва тўрт нафар аёл ҳам бор. Reuters маълумотларига кўра, зарба болалар мактабга боришга тайёрланаётган пайтда турар жой биносига берилган. Исроил армияси эса зарбалар «Ҳизбуллоҳ» объектлари ва жангариларига қаратилганини билдирди.
Ливан Соғлиқни сақлаш вазирлиги маълумотларига кўра, 2 мартдан буён Исроил ҳужумлари оқибатида 4362 киши ҳалок бўлган ва 12 378 киши яраланган. Ҳалок бўлганлар орасида 250 дан ортиқ бола, қарийб 400 аёл ва 130 дан ортиқ тиббиёт ходими бор.
Давом этаётган зарбалар АҚШ воситачилигида Ливан ва Исроил ўртасида ҳарбий ҳаракатларни тўхтатиш бўйича эришилган мўрт келишувлар фонида содир бўлмоқда. Исроил Ливан жанубида ҳарбий ҳузурини сақлаб қолган ва зарбалар инфратузилма ҳамда «Ҳизбуллоҳ» аъзоларига қаратилганини билдирмоқда.
Ливан ҳукумати эса Исроилни келишувларни мунтазам равишда бузишда айбламоқда ва ҳужумларни тўхтатишни талаб қилмоқда.
Ливан Соғлиқни сақлаш вазирлиги маълумотларига кўра, 2023 йил 8 октябрдан буён мамлакатда Исроил агрессияси оқибатида ҳалок бўлганлар сони 8920 нафарга, яраланганлар сони эса 30 559 нафарга етган.
