Трамп Дания ва Гренландия билан орол хавфсизлиги бўйича келишувга эришилганини маълум қилди
АҚШ президенти Дональд Трамп Вашингтон Дания ва Гренландия билан орол хавфсизлиги бўйича янги келишувга эришганини айтди. Унинг сўзларига кўра, ҳужжат АҚШга Гренландия хавфсизлиги масалалари устидан «доимий назорат» имконини беради ва Вашингтонга қарши давлатларнинг оролда ҳарбий ҳузурини чеклашга хизмат қилади.
Reuters аниқлик киритишича, гап орол суверенитетини АҚШга бериш ҳақида эмас, балки Америкага ҳарбий кучларни жойлаштириш, ҳудудга кириш ва парвозларни амалга ошириш бўйича қўшимча ҳуқуқлар бериш ҳақида кетмоқда.
Дания ва Гренландия ҳукуматлари эса келишувни бошқача талқин қилмоқда. Уларнинг маълум қилишича, ҳужжатни келаси ҳафта БМТ Бош Ассамблеяси давомида имзолаш режалаштирилган. Шундан сўнг келишув зарур парламент процедураларидан ўтиши керак.
Дания бош вазири Метте Фредериксеннинг таъкидлашича, «бу келишув бир вақтнинг ўзида Қиролликнинг суверенитети ва ҳудудий яхлитлигини, шунингдек, Гренландия халқи ўз тақдирини ўзи белгилаш ҳуқуқини тан олади».
Гренландия ҳукумати раҳбари Йенс-Фредерик Нильсен эса келишув орол, Дания, АҚШ ва Ғарб иттифоқчиларининг хавфсизлигини мустаҳкамлаши кераклигини айтди. Келишувнинг аниқ шартлари ҳозирча тўлиқ эълон қилинмаган.
Аввалроқ Трамп бир неча бор Гренландия устидан назорат ўрнатишни хоҳлашини айтган ва буни Россия ҳамда Хитой томонидан келаётган хавфлар билан изоҳлаган.
