Америкалик нафақахўр кино томоша қилиш бўйича жаҳон рекордини ўрнатди
Кинони яхши кўрадиганлар орасида бир кунда икки-учта фильм кўришнинг ўзи катта натижа. Аммо америкалик 60 ёшли нафақахўр бу борада ҳаммани ҳайратда қолдирди. У бир йил давомида 1207 та фильм томоша қилиб, Гиннеснинг рекордлар китобига кирди.
Пенсилваниялик кичик Гленвуд Ҳоскин 2024 йил апрелидан 2025 йил апрелигача кинотеатрга мунтазам қатнаб, ҳар куни бир нечта сеансда иштирок этган. Оддий ҳисобда айтганда, у кунига ўртача 3,3 та фильм кўрган. Баъзи кунлари эса эрта тонгдан ярим тунгача кинотеатрда вақт ўтказган.
Қизиғи, бу натижа тасодифан қўлга киритилмаган. Собиқ солиқ хизмати ходими рекорд ўрнатиш учун ҳар бир дақиқани ҳисобга олган. У кинотеатрнинг кунлик жадвалини олдиндан ўрганиб, бир-бирига тўғри келмайдиган сеансларни танлаган ва томоша режасини тузган.
«Мен уйдан ташқарига чиқишни яхши кўраман. Бундан ташқари, ўз кучимни синаб кўриш ва олдимга мақсадлар қўйиш менга ёқади. Жуда тартибли инсонман, шунинг учун тайёргарлик ва режалаштириш жараёнининг ўзи ҳам менга завқ бағишлади», — дейди рекордчи.
Ҳоскин бунгача бир йилда 777 та фильм кўришга муваффақ бўлган америкалик Закария Своупнинг рекордини янгилади. Бунинг учун у кинотеатрда деярли исталганча фильм томоша қилиш имконини берувчи ойига 28 долларлик абонемент сотиб олган.
Албатта, бундай жадвалда овқатланиш ва дам олишни ҳам унутмаслик керак. Ҳоскин таомларни уйида тайёрлаб, киносеанслар орасида овқатланган. Бўш вақтларида эса кинотеатр атрофида сайр қилган ва жисмоний машқлар билан шуғулланган.
Энг қизиғи, унинг бу машғулоти кинотеатр ходимлари билан ҳам яқинлашишига сабаб бўлган. Улар фильмларнинг давомийлигини ҳисоблаш ва бир сеансдан бошқасига улгуришда Ҳоскинга ёрдам беришган.
Рекордчи барча фильмлар ҳам уни бирдек ҳайратлантирмаганини яширмайди. Бироқ айримлари кутганидан анча яхши чиққан. Масалан, «Ёввойи робот» мультфильми ва «Дедпул ва Росомаха» унга манзур бўлган.
Шунга қарамай, Ҳоскиннинг энг севимли жанрлари мультфильмлар ва комедиялар экан. Демак, 1207 та фильм орасида кулги ва саргузаштлар учун ҳам жой етарли бўлган!
Энг ажабланарлиси, у бу рекордни ўрнатиш учун бир йил давомида деярли ҳар куни кинотеатрга борган. Киносеварликнинг ҳам чегараси бормикан?
