Японияда кучли зилзила содир бўлди, камида 22 киши жароҳатланди
Япониянинг марказий қисмида 8 ноябрь куни кучли зилзила содир бўлди. Табиий офат оқибатида камида 22 нафар киши турли даражада жароҳат олгани хабар қилинмоқда.
Япония Метеорология агентлиги маълумотига кўра, ер силкиниши маҳаллий вақт билан соат 01:04 да қайд этилган. Зилзила ўчоғи Сидзуока префектурасининг ғарбий қисмида, тахминан 40 километр чуқурликда жойлашган.
Агентлик зилзила магнитудасини 5,7 деб баҳолаган. АҚШ Геология хизмати эса 5,5 магнитуда кўрсаткичини қайд этган.
Энг кучли силкиниш Айчи префектурасида сезилган. Шунингдек, Ҳамамацу, Киото, Нара шаҳарлари ҳамда Яманаши ва Гифу префектураларида ҳам ер қимирлаган.
Зилзила натижасида айрим дўконларнинг ойналари синиб, жавонлардаги буюмлар ерга қулаб тушган. Одамлар хавфсиз жойга чиқишга уринган, айримлари эса эвакуация вақтида жароҳатланган.
Япония Метеорология агентлиги келгуси бир ҳафта давомида такрорий кучли зилзилалар юз бериши мумкинлигини маълум қилди. Айниқса, кейинги икки-уч кунда эҳтиёткорликни кучайтириш тавсия этилган.
Зилзиладан кейин цунами хавфи қайд этилмаган.
