Месси МЛС тарихида илк бор қайд этилган рекордни ўрнатди
«Интер Майами» ҳужумчиси Лионель Месси кетма-кет иккинчи мавсум МЛСнинг «Олтин бутса» совринини қўлга киритиб, мусобақа тарихида рекорд ўрнатди.
Аргентиналик футболчи мунтазам чемпионатни 26 та гол билан якунлаб, тўпурарлар пойгасида биринчи ўринни эгаллади. У 22 та гол урган «Даллас» ҳужумчиси Петар Мусани ортда қолдирди.
Шу тариқа, Месси МЛС тарихида кетма-кет икки мавсум «Олтин бутса»ни қўлга киритган илк футболчига айланди. У ўтган мавсумда 35 та гол билан ҳам тўпурарлар рўйхатида етакчилик қилган эди.
Мунтазам чемпионатнинг сўнгги турида «Интер Майами» «Шарлотт» билан 3:3 ҳисобида дуранг ўйнади. Майамиликлар учрашув давомида 3:0 ҳисобида олдинда бораётган бўлса-да, ғалабани қўлдан чиқарди. Месси ушбу баҳсда самарали ҳаракат қайд этмади.
«Интер Майами» Шарқий конференцияда иккинчи ўринни эгаллаб, плей-офф босқичига йўл олди. Жамоа илк босқичда «Коламбус Крю»га қарши майдонга тушади.
